Navratri 2024 : नवरात्रीचा सातवा दिवस, अशी करा माता काळरात्रीची पूजा, होईल मृत्यूचे भय दूर

 Navratri 2024 :  

आज नवरात्रीचा सातवा दिवस आहे. नवरात्रीच्या सातव्या दिवसाला महासप्तमी असेही म्हणतात. नवरात्रीच्या सातव्या दिवशी कालरात्रीची पूजा केली जाते. माता दुर्गेच्या नऊ अवतारांपैकी देवी कालरात्रीला सर्वात क्रोध असणारी देवी मानली जाते. कारण जेव्हा जेव्हा पृथ्वीवर पाप वाढते तेव्हा देवी राक्षसांचा नाश करण्यासाठी कालरात्रीच्या अवतारात येते.

देवी कालरात्रीला रात्रीची देवी देखील म्हटले जाते. परंतु देवी कालरात्री फक्त दुष्टांचा वध करते. असं म्हटलं जातं की, कालरात्रीची पूजा करणाऱ्या कोणत्याही भक्ताला अकाली मृत्यूचा धोका नाही. चला, जाणून घेऊया नवरात्रीच्या सातव्या दिवशी कालरात्रीची विशेष पूजा पद्धत, नैवेद्य आणि महत्त्व.

माता काळरात्रीची पौराणिक कथा

पौराणिक कथेनुसार, एकेकाळी शुंभ, निशुंब,रक्तबी यांसारख्या दुष्ट राक्षसांनी भूतलावर उच्छाद केला होता. लोकांसह देवांनाही त्रास दिला होता. बघेल त्याला उचलणे, मारणे हा त्यांचा नित्यक्रम बनला होता. त्यामुळे वैतागलेले देव गण भगवान शंकरांचा धावा करू लागले.

जेव्हा भगवान शंकरांकडे देव गेले, तेव्हा महादेवांनी माता पार्वतीला या राक्षसांचा विनाश करा असे सांगितले. देवीने महिषासुर रूप धारण करून राक्षसाचा वध केला. पण त्या राक्षसाच्या धडातून अनेक राक्षसांची उत्पत्ती झाली. तेव्हा त्यांचा विनाश करण्यासाठी माता काळरात्रीची निर्मिती पार्वती मातेने केली.

या रक्तबिजातून निर्मित झालेल्या राक्षसांचे मुख धडावेगळे करून त्यातून येणारे रक्त कालीमातेने प्राशन केले. त्यामुळे राक्षसांची निर्मिती थांबली आणि देवीने सर्वच राक्षसांचा वध केला. (Navratri 2023)

काळरात्री मातेची पूजा कशी करावी

सकाळी लवकर उठून आंघोळ वगैरे करून स्वच्छ कपडे घाला. मातेच्या मूर्ती, प्रतिमेला गंगाजलाने किंवा शुद्ध पाण्याने स्नान घाला. देवीला लाल रंगाचे कपडे अर्पण करावेत. देवीला फुले अर्पण करून तिथे दिवा लावावा. शेवटी देवीच्या मंत्राचा जाप करून देवीची आरती करावी.

देवीचा मंत्र- ‘ओम ऐं ह्रीं क्लीं चामुण्डायै विच्चै ऊं कालरात्रि दैव्ये नम:।’

मातेला कोणता रंग आवडतो

दुर्गेचे हे रूप थेट मैदानात उतरून राक्षसांचा विनाश करणारे आहे. त्यामुळे देवीच्या या रूपाला रक्तासारखा लाल भडक रंग जास्त आवडतो. त्यामुळे देवीची पूजा करताना लाल कपडे परिधान करा. तसेच देवीला लाल रंगाची फुले अर्पण करा.