मुंबई : राज्य सरकारने सुरू केलेल्या ‘मुख्यमंत्री माझी लाडकी बहीण’ या महत्त्वाकांक्षी योजनेचा प्रचार करताना राष्ट्रवादी काँग्रेसच्या जनसन्मान यात्रेत योजनेच्या नावातून ‘मुख्यमंत्री’ हा शब्द वगळण्यात आला. मात्र यामुळे अस्वस्थ झालेल्या शिवसेनेच्या मंत्र्यांनी थेट मंत्रिमंडळ बैठकीत नाराजी व्यक्त करत जाब विचारला. बैठकीत या मुद्द्यावर झालेल्या गरमागरम चर्चेनंतर ‘राष्ट्रवादी’ने माघार घेतली. या योजनेचे पूर्ण नाव वापरण्याची हमी उपमुख्यमंत्री अजित पवार यांच्या पक्षाने दिली आहे.