Manoj Jarange : "विधानसभेत आपले 40-50 लोक पाहिजेत"; जरांगेंकडून विधानसभेची तयारी सुरु, म्हणाले, आता गेम...

आंतरवली सराटी : मराठा आरक्षणासाठी आंदोलक मनोज जरांगे सध्या आंतरवली सराटी इथं उपोषण करत आहेत. यावेळी त्यांनी माध्यमांशी संवाद साधताना विधानसभेची तयारी सुरु करणार असल्याचे संकेत दिले. विधानसभेत आपले ४० ते ५० प्रतिनिधी पाहिजेत, असं त्यांनी म्हटलं आहे. तसंच आता आपण विद्यमान आमदारांचे गेम करणार असल्याचंही त्यांनी म्हटलं.

जरांगे म्हणाले, "आपल्याला जर काही अडचणी आल्या तर विधानसभेत बोलायला कोणीच नाहीत. जसं ग्रामपंचायतमध्ये आपला सदस्य असला पाहिजे तर आपला विकास होतो. तसं शेतकऱ्याचे कोणी प्रश्न मांडायला विधानसभेत नाही. पिकविमा, शेतकरी आत्महत्या, शेतमालाला भाव, मराठा आरक्षण, मुस्लीम आरक्षण, दलित, बारा बलुतेदार, बंजारा, धनगर बांधवांचे प्रश्न मांडायला कोणी नाही. लोकांनाच सांगावं लागतं करतो का एवढं काम? या आमदाराच्या मनात आलं तर तो करतो काम नाहीतर नाही"

त्यामुळं आपले ४० ते ५० लोक पाहिजेत तिथं, ते विधानसभाच बंद पाडतील. त्यांनीच कोणते कोणते मतदारसंघ लढायचेत हे आता ठरवायला पाहिजे. नुसतं इथं पडून राहण्यापेक्षा सरकारमध्ये आपलेच लोक घालू ना? आजपासून मी कोणाच्याच टीकेला उत्तर देणार नाही. आता नुसते गेम लावणार आहे. भाजपतील जी मराठ्यांची माकडं आहेत आणि ते जे बरळत आहेत त्यांना बरळू द्या त्यांना मी उत्तरं देणार नाही. आता मी कोणाला कसं पाडायचं त्याचं नियोजन करणार आहे, असा इशाराही यावेळी मनोज जरांगे यांनी दिला.