सबस्क्राईब करा
राज्यात गेल्या काही वर्षांपासून मराठा आरक्षणाचा प्रश्न निर्माण झाला आहे. याचबरोबर गेल्या वर्षभरापासून मनोज जरांगे यांच्या नेतृत्त्वाखाली मराठा समाज आरक्षणाची मागणी करत आहे.
आता अशात माजी केंद्रीय मंत्री शरद पवार यांनी मराठा समाजाला आरक्षण कसे मिळू शकते याबाबत उपाय सांगितला आहे.
सांगलीमध्ये बोलताना शरद पवार म्हणाले की, केंद्र सरकारने आरक्षणाची मर्यादा 75 टक्क्यांपर्यंत वाढवण्यासाठी पुढाकार घ्यावा. जर केंद्राने हा निर्णय घेतला तर त्याला आमचा पाठिंबा असेल. तामीळनाडूत आरक्षण 78 टक्क्यांपर्यंत नेलं जातं तर महाराष्ट्रात का नाही? असा सवालही पवार यांनी उपस्थित केला.
मराठा आरक्षणावर राष्ट्रवादीचे (SP) अध्यक्ष शरद पवार म्हणाले, "आरक्षण दिले पाहिजे, अशी प्रत्येकाची भावना आहे. त्यात काही गैर नाही. मात्र हे करत असताना इतरांना मिळणारे आरक्षणही जपले गेले पाहिजे, हेही लक्षात घेतले पाहिजे. त्यांचे कोणत्याही प्रकारे नुकसान होऊ नये. आरक्षणाच्या सध्याच्या पद्धतीनुसार 50% च्या वर आरक्षण देता येत नाही आणि जर आरक्षण 50% च्या वर घ्यायचे असेल तर माझ्या मते कायदा बदलावा लागेल."
आगामी महाराष्ट्र विधानसभा निवडणुकीच्या महाविकास आघाडीच्या जागावाटपाबाबत शरद पवार म्हणाले, "मी जागावाटपाच्या चर्चेत सहभागी नाही, त्यामुळे या विषयावर मी काहीही बोलणे योग्य ठरणार नाही. जयंत पाटील हे आमच्यावतीने उपस्थित असतात. या विषयावर ते बोलतील."
पवार पुढे म्हणाले, "लोकसभेच्या जागावाटपावेळी नाना पटोले आणि शिवसेनेचे संजय राऊत यांच्यात कोणतेही मतभेद झाले नाही. महाविकास आघाडीतील संघर्ष फक्त एकाच ठिकाणी झाला तो म्हणजे सांगलीबाबत, सांगलीशिवाय कोणत्याही मतदारसंघात अशी घटना घडली नाही."
पंतप्रधान नरेंद्र मोदी यांनी CJI DY चंद्रचूड यांच्या निवासस्थानी गणेश पूजेसाठी भेट दिल्यावर विरोधकांनी त्यावर टीका केली होती. याबाबत बोलताना पवार म्हणाले, "मला या विषयावर बोलायला आवडणार नाही. सरन्यायाधीश आणि पंतप्रधान हे सर्वोच्च पदावर आहेत. त्यामुळे या पदांची प्रतिष्ठा राखणे ही प्रत्येकाची जबाबदारी आहे."
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
