Manoj Jarange Patil: मोठी घडामोड, फडणवीसांचा जरांगेंना फोन अन्...; वाचा नक्की काय झाली चर्चा

Latest Marathwada News: मराठा आरक्षणाच्या मुद्द्यावरून सरकारवर वेळोवेळी टीका करणाऱ्या मनोज जरांगे पाटील यांना फडणवीसांनी फोन केला. त्यांनी केलेल्या या फोनची संपूर्ण राज्यात चर्चा सुरू आहे.

राज्याचे मंत्री अब्दुल सत्तार व मराठा नेते मनोज जरांगे पाटील यांचे आज पहाटे तब्बल तीन तास चर्चा झाली. यावेळी मनोज जरांगे पाटील यांची व फडणवीसांची फोन वरून चर्चा झाल्याची माहिती समोर येत आहे.

अतिवृष्टीमुळे शेतकऱ्यांचे मोठे नुकसान झाले आहे त्यांना नुकसान भरपाई मिळावी यासाठी ही चर्चा झाली. अति मुसळधार पावसामुळे शेतकऱ्यांचे खुप नुकसान झालं असून त्यांना सरसकट नुकसान भरपाई मिळाली पाहिजे अशी मागणी मनोज जरांगे यांनी सरकारकडे केली आहे.अशी माहीती स्वत: मनोज जरांगे पाटील यांनी दिली.

यावेळी जरांगे म्हणाले की, देवेंद्र फडणवीस यांचा फोन आला होता, त्यांना मी सरसकट शेतकऱ्यांना नुकसान भरपाई देण्याची मागणी केली आहे. गोरगरीब शेतकरी खचला आहे, त्यांना आधार देणं सरकारचं काम आहे.

आज कॅबिनेट बैठकीत आम्ही निर्णय घेतो असं फडणवीस म्हणाले असल्याचेही ते म्हणाले. तर शेतकऱ्यांचं जे नुकसान झालंय ते तुम्हाला द्यावं लागणार आहे. शेतकऱ्यांसाठी थोडे नियम बाजूला ठेवा, तुम्हाला शेतकरी भरभरून आशीर्वाद देईल असेही जरांगे म्हणाले.