Manoj Jarange: 'मला घाबरवण्याचा प्रयत्न, पण...'; अंतरवलीत घिरट्या घालणाऱ्या ड्रोनवर जरांगे काय म्हणाले?

जालना- अंतरवाली सराटी येथे गेल्या काही दिवसांपासून ड्रोन घिरट्या घातल असल्याने गावकऱ्यांमध्ये भितीचे वातावरण निर्माण झाले आहे. या पार्श्वभूमीवर मनोज जरांगे पाटील यांनी प्रतिक्रिया दिली आहे. अंतरवाली सराटी येथे ड्रोन फिरत आहेत. मी समाजाकरिता आरक्षण लढा लढत आहे, ड्रोन फिरत असले तरी मी घाबरणार नाही, माझा लढा सुरूच राहील ,कोणाला काय साध्य करायचे आहे हे माहित नाही, मी घाबरुन माझा आरक्षण लढा व दौरा थांबवणार नाही, असं जरांगे म्हणाले.

अंतरवाली सराटी ता.अंबड या गावात चार दिवसापासून आकाशात ड्रोन फिरत असल्याचे लक्षात आल्यामुळे सुरक्षिततेच्या दृष्टीने सरपंच कौशल्या तारख यांचे चिरंजीव पांडुरंग तारख व ग्रामस्थांनी गोंदी पोलीस स्टेशनला सोमवार ता.01 रोजी रात्री माहीती दिली आहे.

मागील आठवड्यात सरपंच कौशल्याबाई तारख यांच्या घर परिसरात आणि गावात मध्यरात्री ड्रोन फिरले, सोमवार ता.1 रोजी पुन्हा साडे नऊ ते दहा दरम्यान दोन ड्रोन फिरत असल्याचे लक्षात आले, याची पाहणी मनोज जरांगे ,पांडुरंग तारख व सहकारी यांनी सोमवार ता.1 रोजी रात्री सरपंच कौशल्याबाई तारख यांच्या घराच्या छतावरुन केली आहे. एक कॅमेरा सरपंच राहत असलेल्या परिसरात तर दुसरा गावात फिरत असल्याचे नागरिक सांगत आहेत , उंच आकाशातून फक्त घिरट्या घालण्यात येत होते, याचे खालून लाईट चमकताना दिसत होते

अंतरवाली सराटी हे गाव मराठा आंदोलनाचे केंद्र बनलेले आहे, गावात मनोज जरांगे हे सरपंच श्रीमती तारख यांच्या निवासस्थानी आणि उपोषण स्थळाजवळील लहुराव तारख यांच्या घरी मुक्कामी असतात , ड्रोनच्या घिरट्या गत आठवड्यापासून सुरू असल्याने आंदोलनामुळे ड्रोनच्या घिरट्या सुरू आहे का? दुसरे काही आहे का? किंवा जरांगे हे सहा जुलैपासून राज्यातील भागात दौरा करणार आहेत. त्यासाठी त्यांच्यावर नजर ठेवली जात आहे का ? असा संशय निर्माण झाला आहे.

नागरिकांमध्ये ड्रोनच्या घिरट्यांनी भितीचं वातावरण आहे. गावात पोलीस बंदोबस्त तैनात आहे, ड्रोनचं गुढ कायम असून ड्रोन नक्की कोण उडवतयं? त्यामागचा उद्देश कायं? याचा शोध घेण्याची मागणी ग्रामस्थांनी व सरपंच श्रीमती कौशल्या तारख यांचे चिरंजीव पांडुरंग वसंतराव तारख यांनी गोंदी पोलीस प्रशासनाकडे केली आहे.