Ladki Bahin Yojna: "तुम्हाला मुख्यमंत्री सर म्हणणार नाही, तर भाऊ म्हणेन..."मुख्यमंत्री ‘भावा’शी लाडक्या बहिणींचा संवाद

मुंबई, ता. १५ : ‘मी आता तुम्हाला मुख्यमंत्री सर म्हणणार नाही, तर भाऊ म्हणेन. रक्षाबंधनापूर्वी मला ओवाळणी मिळाली,’ अशा शब्दांत राज्यभरातील भगिनींनी आपल्या भावना भावाकडे व्यक्त केल्या. कालपासून (ता. १४) मुख्यमंत्री माझी लाडकी बहीण योजनेच्या दोन हप्त्यांची एकत्रित रक्कम (तीन हजार रुपये) भगिनींच्या खात्यात जमा होण्यास सुरुवात झाली आहे. आजपर्यंत सुमारे ८० लाख भगिनींच्या खात्यांत प्रत्येकी तीन हजार रुपये जमा झाले असून आज या लाभार्थ्यांशी मुख्यमंत्री एकनाथ शिंदे यांनी प्रातिनिधिक स्वरूपात संवाद साधला.

त्या वेळी लाभार्थी भगिनींनी आपल्या भावना व्यक्त करताना, ‘मुख्यमंत्र्यांची बहीण’ अशी नवीन ओळख निर्माण झाल्याचे सांगत मनमोकळेपणाने आपल्या मुख्यमंत्री भावाशी संवाद साधला.
राज्यभरातील भगिनींच्या चेहऱ्यावरील आनंद पाहून समाधान वाटल्याचे सांगत ही योजना केवळ निवडणुकीपुरता नाही, ती कायम आहे. योजनेकरिता या आर्थिक वर्षासाठी पूर्णपणे तरतूद करण्यात आली असून तुम्हाला योजनेचा लाभ मिळत राहील, अशी ग्वाही मुख्यमंत्री एकनाथ शिंदे यांनी आपल्या राज्यभरातील बहिणींना दिली.