Sambhaji Raje Chhatrapati : पाडण्यापेक्षा विधानसभेत चांगली माणसे पाठवा,संभाजीराजे यांचे जरांगेंना आवाहन

नांदेड : छत्रपती शिवाजी महाराज, राजर्षी शाहूंनीही बहुजन समाज एकत्र राहिला पाहिजे, असे सांग‍ितले आहे. त्यानिमित्त ॲड. प्रकाश आंबेडकर व मनोज जरांगे एकत्र राहणार असतील, तर ती चांगलीच गोष्ट आहे.

आम्हीही जरांगे यांना विनंती केलेली आहे, पाडण्यापेक्षा सकारात्मक दृष्टिकोन ठेवून चांगली माणसे तुमच्या किंवा स्वराज्य पक्षाच्या माध्यमातून विधानसभेत जायला हवीत, अशी भूमिका स्वराज्य पक्षाचे अध्यक्ष संभाजीराजे छत्रपती यांनी जाहीर केली.

अतिवृष्टीमुळे शेतीचे नुकसान झालेल्या शेतकऱ्यांना अनुदान द्यावे, यासह विविध मागण्यांसाठी संभाजीराजे यांच्या नेतृत्वात सोमवारी (ता. १४) जिल्हाधिकारी कार्यालयावर आसूड मोर्चा काढण्यात आला. तत्पूर्वी त्यांनी माध्यमांशी संवाद साधला. विधानसभेच्या २८८ जागांपैकी सगळ्यात जास्त जागा लढविण्याचा आमचा मानस आहे.

आम्ही महाशक्ती निर्माण केली असून, प्रस्थापितांपेक्षा विस्थापितांना तिकीट देणार आहोत. पण, चांगले प्रस्थापित आले तर त्यांना स्वीकारूसुद्धा, असे ते म्हणाले. संभाजीराजे छत्रपती म्हणाले, महाविकास आघाडी आणि महायुतीमध्ये मोठा गोंधळ सुरू आहे.

त्यामधील नाराज लोक हे कोणासोबत जातील, हे सांगता येत नाही. तुम्हाला वेगळे चित्र काही दिवसांत परिवर्तन महाशक्तीसंदर्भात पाहायला मिळेल. परिवर्तन महाशक्तीच्या माध्यमातून आम्ही एक चांगला पर्याय या वेळेस घेऊन येत आहोत, असा आशावाद त्यांनी व्यक्त केला.