दुसऱ्यांदा आई होणार लोकप्रिय मराठी अभिनेत्री; ८ महिन्याची गरोदर असतानाही करत होती काम, आता मालिकेतून एक्झिट

मराठी मालिका या प्रेक्षकांच्या अत्यंत जवळच्या आहेत. मालिकांमध्ये दिसणारे कलाकारही प्रेक्षकांच्या कायमस्वरूपी लक्षात राहतात. हे कलाकार प्रेक्षकांच्या घरातलेच एक सदस्य होतात. कलाकारही चाहत्यांसोबत आपल्या वैयक्तिक आयुष्यातील अनेक गोष्टी शेअर करत असतात. अशातच एका मराठी अभिनेत्रीने चाहत्यांना गुडन्यूज दिली आहे. ही अभिनेत्री लवकरच तिच्या दुसऱ्या बाळाला जन्म देणार आहे. त्यामुळे तिने आता मालिकेतूनही एक्झिट घेतली आहे. ही अभिनेत्री आहे प्रेक्षकांची लाडकी खुशबू तावडे. खुशबूने 'सारं काही तिच्यासाठी' या मालिकेचा निरोप घेतला आहे.

खुशबू गरोदर असून ती लवकरच तिच्या दुसऱ्या बाळाला जन्म देणार आहे. अभिनेत्रीने नुकतीच ही गुडन्यूज दिली आहे. तिने चाहत्यांसोबत ही बातमी शेअर केली नसली तरी तिने 'सारं काही तिच्यासाठी' मालिकेतून एक्झिट घेतली आहे. नुकतेच तिने तिचे मालिकेतील शेवटचे काही भाग शूट केले आहेत. खुशबू ही आठ महिन्याची गरोदर असतानाही काम करत होती. अखेर तिने मालिकेचा निरोप घेतला आहे. आता तिची जागा एक दुसरी अभिनेत्री घेणार आहे.

खुशबू आणि संग्राम साळवी यांची जोडी प्रेक्षकांची आवडती जोडी आहे. त्यांनी २०१८ साली लग्नगाठ बांधली होती. त्यानंतर २०२१ मध्ये खुशबूने एका मुलाला जन्म दिला होता. तिच्या मुलाचं नाव राघव असून आता खुशबू तिच्या दुसऱ्या बाळाचं स्वागत करणार आहे. यासंदर्भात राजश्री मराठीला दिलेल्या मुलाखतीत अभिनेत्री म्हणाली, ''मी आई होते आहे आणि हे आईपण निभावण्यासाठी मला मालिकेतून निरोप घ्यावा लागतो आहे. या मालिकेला वर्ष झाले असून, ८ महिने गरोदरपणात मी मालिकेच्या सेटवर काम केलं.' आता खुशबूच्या जागी दुसरी लोकप्रिय अभिनेत्री दिसणार आहे.