अखेर पाठकबाईंची झी मराठीवर एंट्री झालीच! 'या' मालिकेत दिसणार अक्षया देवधर, पोस्ट शेअर करत म्हणाली- नवा प्रवास...

Akshaya Deodhar New Serial: छोट्या पडद्यवरील लोकप्रिय अभिनेत्री अक्षया देवधर हिने आपल्या अभिनयाने प्रेक्षकांना आपलंसं केलं. अक्षयाने पाठक बाई बनून प्रेक्षकांच्या मनात स्थान मिळवलं. 'तुझ्यात जीव रंगला' या मालिकेतुन ती घराघरात पोहोचली. त्यानंतर मात्र अनेक वर्ष अक्षया छोट्या पडद्यावरून गायब होती. प्रेक्षक तिच्या नव्या मालिकेची आतुरतेने वाट पाहत होते. मात्र अक्षया काही वेगळ्या कामात गुंतल्यामुळे छोट्या पडद्यावर परत आली नव्हती. मात्र आता अक्षयाने चाहत्यांना गुड न्यूज दिली आहे. प्रेक्षकांची लाडकी पाठकबाई आता पुन्हा एकदा प्रेक्षकांच्या भेटीसाठी सज्ज झाली आहे. ती आता झी मराठीच्या नव्या मालिकेमध्ये झळकणार आहे.

दोन दिवसापूर्वी झी मराठीची नवी मालिका 'लक्ष्मी निवास' चा प्रोमो शेअर करण्यात आला. यात त्यांच्या फोटोत उभ्या असलेल्या अक्षयाला प्रेक्षकांनी ओळखलं. 'लक्ष्मी निवास या मालिकेत अभिनेते तुषार दळवी आणि अभिनेत्री हर्षदा खानविलकर मुख्य भूमिकेत आहेत. तर पाठकबाई म्हणजेच अक्षया त्यांच्या मुलीच्या भूमिकेत दिसणार असल्याचं सांगण्यात येतंय. आपल्या मुलींच्या लग्नासाठी चिंतेत असलेले आईवडील स्वतःच्या घराचं स्वप्न उराशी बाळगून आहेत. अक्षयाने एक पोस्ट करत तिच्या नव्या मालिकेबद्दल सांगितलं आहे. तिने हर्षदा आणि तुषार यांच्यासोबत एक फोटो शेअर केला आहे आणि लिहिलंय, 'लक्ष्मी निवास नवा प्रवास सुरू.' आता प्रेक्षक तिला पुन्हा एकदा छोट्या पडद्यावर पाहण्यासाठी प्रचंड उत्सुक आहेत.

अक्षयाने हार्दिक जोशीसोबत लग्नगाठ बांधली. त्यानंतर ती एका चित्रपटातही झळकली. ती एक बिझनेस वूमनदेखील झाली आहे. तिने तिच्या मैत्रिणींसोबत मिळून एक साड्यांचं दालन सुरू केलंय. या दुकानाचं नाव भरजरी असून हे दुकान पुण्यात आहे.