अमृता खानविलकरने खरेदी केलं नवं घर, २२ व्या मजल्यावरून दिसतंय सारं शहर; घराचं नाव वाचलंत का?

गेल्या दोन वर्षात अनेक मराठी कलाकारांनी आपलं स्वप्न पूर्ण करत नव्या घरत गृहप्रवेश केला. छोटंसं का होईना पण आपल्या हक्काचं घर असावं अशी प्रत्येकाची इच्छा असते. यावर्षीही अनेक कलाकारांनी हक्काचं घर घेतलं. आता या कलाकारांच्या यादीत आणखी एका अभिनेत्रीचं नाव जोडलं गेलंय. आपल्या अभिनयाने प्रेक्षकांची मनं जिंकणारी लोकप्रिय अभिनेत्री अमृता खानविलकर हिने आपल्या हक्काचं घर खरेदी केलंय. या घराची एक झलक तिने आपल्या इंस्टाग्रामवर शेअर केली आहे. आज लक्ष्मीपूजनाच्या मुहूर्तावर तिने ही गुड न्यूज चाहत्यांसोबत शेअर केलीये.

अमृताने तिच्या इंस्टाग्रामवर तिच्या नव्या घराचा व्हिडिओ शेअर केलाय. अजून या घराचं काम सुरू आहे मात्र आपलं एक स्वप्न पूर्ण झालं असं तिने या पोस्टमध्ये लिहिलंय. हा व्हिडिओ शेअर करत तिने लिहिलं, ' चला भेट झालीच आपली कधी काळी दूर कुठेतरी तुझं स्वप्न पाहिलं होतं, आणि ते पूर्ण करण्याचा प्रयत्न रोज सुरू होता. तर ही आपली पहिली दिवाळी….तुला खूप गोष्टी सांगायच्या आहेत, मला काय आवडतं, काय नाही, मनातलं गुपित, शांततेतलं ….सारं काही हळूहळू तुला कळेलच. तुलाही मला खूप काही सांगायचं असेल…माझी पूर्ण तयारी आहे. तू अजून हळूहळू आकार घेतोयस, तुझ्या कानाकोपऱ्यात मी माझं सगळं जग बसवायचा प्रयत्न करतेय. तू ही अगदी माझ्या हो ला हो म्हणतोयस…. आवडतंय मला….. लवकरच भेटू नव्या कोऱ्या भिंतींसह नव्या आठवणी बनवण्यासाठी नवं आयुष्य उलगडण्यासाठी. दिवाळीच्या शुभेच्छा.'

या घराला अमृताने 'एकम' हे नाव दिलंय. याचा अर्थ सुरुवात असा होतोय. तिने घराला वेगळं असं नाव दिलंय. हा महिना अमृताचा आहे कारण दिवाळीसोबतच या महिन्यात तिचा वाढदिवस देखील आहे. त्यामुळे ती आनंदी आहे. सध्या अमृताच्या या घराचं काम सुरू आहे. अमृतावर कलाकारांसोबत नेटकऱ्यांनी शुभेच्छांचा वर्षाव केला आहे. अमृता शेवटची 'चंद्रमुखी' या चित्रपटात दिसली होती.