माझ्या घरी चटणी भाकर खायला येशील का? अंकिताने दिलेला शब्द पाळला, दाजींसोबत सुरजच्या मळ्यात पोहोचली कोकणकन्या

छोट्या पडद्यावरील लोकप्रिय कार्यक्रम ''बिग बॉस मराठी ५' ने यावेळेस प्रेक्षकांना अक्षरशः वेड लावलं. यावेळेस सगळयात जास्त लोकप्रिय ठरला तो म्हणजे रीलस्टार सुरज चव्हाण. बिग बॉसच्या घराची ही खासियत आहे की या घरात जे भेटतात ते नेहहमी एकमेकांशी जोडले जातात. घराबाहेर आल्यानंतरही त्यांचं नातं तसंच राहतं. या सीझनमध्ये ही घरात वेगवेगळी नाती पाहायला मिळाली होती. सूरज चव्हाण याला अंकिता वालावलकर, जान्हवी किल्लेकर यांनी भाऊ मानलं होतं. यापूर्वी जान्हवी त्याच्या गावी येऊन गेली. मात्र अंकिता त्याला भेटायला गेली नव्हती. आता अंकितानेही त्यांना दिलेला शब्द पाळलाय. अंकिता तिच्या होणाऱ्या नवऱ्याला घेऊन थेट सुरजच्या मळ्यात पोहोचलीये.

अंकिताने एक व्हीडिओ शेअर करत सुरजसोबतची भेट शेअर केली आहे. यात ते सगळे म्हणजेच सुरज, अंकिता, तिचा होणारा नवरा, सुरजच्या घरातले आणि इतर मंडळी शेतात दिसतायत. तर सुरजची बहीण त्या सगळ्यांसाठी जेवण बनवून आणते. भाकरी, शेंगदाणा मिरचीची चटणी आणि बटाट्याची कापं असा जेवणाचा बेत आहे. सगळेच हे जेवण आनंदाने खाताना दिसतायत. सुरजच्या गावातल्या मळ्यात ते सगळे बसलेले दिसतायत. तर हा व्हिडिओ शेअर करताना अंकिताने लिहिलं, 'बिग बॉस च्या घरात असताना सूरज नेहमी म्हणायचा माझ्या घरी चटणी भाकर खायला येशील … आणि मी “हो” अस म्हटलं की तो म्हणायचा “खरच… अगं बाया ग“😂😂😂😂 तर ही होती आमची “अगं बाया ग Moment'.

त्यांचा हा व्हिडिओ सध्या प्रचंड व्हायरल होतोय. तर यासोबतच शेअर केलेल्या आणखी एका व्हिडिओमध्ये अंकिता त्यांच्या गावातल्या मरीआईच्या देवळात दर्शन घेताना दिसत आहेत. तर नेटकरीही त्याचं कौतुक करताना दिसत आहेत, अंकिता शेवटी सूरजला भेटायला आलीच, असं म्हणत ते ट्रोलर्सचीही बोलती बंद करताना दिसतायत.