'सिंघम अगेन'मध्ये झळकतायत एक दोन नाही तर तीन मराठी कलाकार; एकाला तर दीपिकाने ऑनस्क्रीन धुतलाय

अजय देवगन, दीपिका पादुकोण, रणवीर सिंग, अक्षय कुमार, टायगर श्रॉफ यांसारखी तगडी स्टार कास्ट असलेला 'सिंघम अगेन' हा चित्रपट बॉक्स ऑफिसवर धुमाकूळ घालतोय. पहिल्या पाच दिवसातच या चित्रपटाने बॉक्स ऑफिसवर तब्बल १५० कोटींचा बिझनेस केलाय. या चित्रपटाने आतापर्यंत १५३ कोटींची कमाई केलीये. तर संपूर्ण जगभरात या चित्रपटाने तब्बल २०० कोटींचा आकडा पार केलाय. रोहित शेट्टीच्या कॉप युनिव्हर्सची झलक दाखवणाऱ्या या चित्रपटाला प्रेक्षकांची चांगलीच पसंती लाभली आहे. मात्र सगळ्यांना वेड लावणाऱ्या या चित्रपटात मराठी कलाकारांचा देखील बोलबाला आहे हे तुम्हाला माहित आहे का?

अजय देवगनच्या 'सिंघम अगेन' मध्ये एक दोन नाही तर तीन मराठी कलाकार झळकले आहेत. तीन कलाकारांनी या चित्रपटात आपल्या अभिनयाची छाप पाडली आहे. त्यातील एकाला आपल्या लेडी सिंघमने चांगलंच धुतलंय. कोण आहेत हे कलाकार? यातील पहिली कलाकार आहे अभिनेत्री भाग्या नायर. 'रात्रीस खेळ चाले' या लोकप्रिय मालिकेतून प्रेक्षकांच्या भेटीला आलेली भाग्या मालिकेत अभिरामच्या पत्नीच्या म्हणजेच कावेरीच्या भूमिकेत होती. तिच्या या पात्राला प्रेक्षकांचं प्रेम मिळालं होतं.

तिच्यासोबत लोकप्रिय अभिनेता अंकित मोहन हा देखील चित्रपटात आहे. अंकित यापूर्वीओ अनेक मराठी चित्रपटात दिसला आहे. त्याने काही चित्रपटात मुख्य भूमिका देखील केल्या आहेत. आता तो लवकरच ;वीर मुरारबाजी' या चित्रपटात दिसणार आहे.

तर यांच्या सोबत झळकलेला तिसरा अभिनेता आहे चेतन चिटणीस. चेतन यापूर्वी काही मालिका आणि चित्रपटात दिसलाय. त्याने ऋता दुर्गुळेच्या 'अनन्या' या चित्रपटात काम केलं होतं. त्यासोबतच तो 'मलाल' या चित्रपटातही दिसला होता. त्याने आणि अंकित मोहन यांनी दीपिका पादुकोण सोबत स्क्रीन शेअर केली आहे. तर चेतनने त्याचा दिपीकाकडून मार खातानाचा चित्रपटातील फोटोही शेअर केलाय. हे तीनही कलाकार 'सिंघम अगेन मध्ये झळकतायत.