Bigg Boss Marathi: मला इथे नाही राहायचं! रडतच अभिनेत्रीने व्यक्त केली घरातून बाहेर जाण्याची इच्छा, रितेशने काय निर्णय घेतला?

छोट्या पडद्यावरील लोकप्रिय कार्यक्रम 'बिग बॉस मराठी ५' ने सध्या प्रेक्षकांची मनं जिंकली आहेत. हा कार्यक्रम दिवसेंदिवस आणखीनच लोकप्रिय होत आहे. या सीझननेदेखील सोशल मीडियावर धुमाकूळ घातला आहे. त्यात घरात दोन गट पडले आहेत. या आठवड्यातही भाऊच्या धक्क्यावर रितेश देशमुखने काही सदस्यांना त्यांची चूक दाखवून दिली. जान्हवी किल्लेकरला देखील या आठवड्यात खूप ऐकून घ्यावं लागलं आहे. मात्र भाऊच्या धक्क्यावर आणखी एक गोष्ट घडली आहे. घरातील एका सदस्याने घरातून बाहेर जाण्याची इच्छा व्यक्त केली. आपण इथे नाही राहू शकत असं ती व्यक्त म्हणाली आहे.

छोट्या पडद्यावरील लोकप्रिय अभिनेत्री योगिता चव्हाण हिने घरातून बाहेर जाण्याची इच्छा व्यक्त केली आहे. योगिता रितेशशी बोलताना म्हणाली, 'मला नाही माहीत मी कशी खेळतेय, चांगली की वाईट पण मला इथे नाही राहायचं. माझी चूक झाली. मी इथे आले. मी इथे यायलाच नको होतं. मला आता अनेकजण म्हणतील की तू आलीस का मग इथे? यायचं नव्हतं. हो मी मान्य करते माझं चुकलं. पण मला हे सहन नाही होत. मी इथे नाही राहू शकत. मला प्लिज बाहेर जायचंय. मला घरात राहायचं नाहीये. मला हा खेळ सोडायचा आहे.' असं म्हणत योगिता रडू लागली.'

त्यावर रितेश तिला समजावत म्हणाला, 'आता इथे कुणी राहायचं आणि कुणी नाही हे मी नाही ठरवू शकत हे जनता ठरवणार. तुम्हाला असं का वाटतंय माहीत नाही पण तुम्ही चांगलं खेळताय. अशाच खेळत राहा. आता तरी तुम्ही असं हे घर सोडून बाहेर जाऊ शकणार नाही.' त्यामुळे योगिताला असं मधेच बिग बॉस मराठीचं घर सोडून जात येणार नाहीये. तर दुसरीकडे चाहत्यांनीही प्रतिक्रिया देत ती चांगली खेळतेय. आम्ही तुझ्या पाठीशी आहोत. घाबरू नको असं म्हणत तिला धीर दिला आहे.