बिग बॉसच्या घरात मोठा ट्विस्ट! वोटिंग लाईन बंद तरीही अंकिता वालावलकर झाली घराबाहेर, नवा प्रोमो पाहून नेटकरी शॉक

'बिग बॉस मराठी ५' ची फॉलोविंग प्रचंड मोठी आहे. प्रेक्षक या कार्यक्रमावर भरभरून प्रेम करताना दिसतायत. आता या खेळाचा पाचवा आठवडा सुरू झाला आहे. खेळाच्या नियमाप्रमाणे प्रत्येक आठवड्यात एक सदस्य घराबाहेर होतो. या आठवड्यात चार सदस्य घराबाहेर जाण्यासाठी नॉमिनेट होते. मात्र या आठवड्यात वोटिंग लाइन्स बंद होत्या. त्यामुळे या वीक मध्ये कुणीही घराबाहेर जाणार नाही असं वाटत होतं . मात्र इथेच घरात मोठा ट्विस्ट आला आहे. वोटिंग लाईन्स बंद असतानाही अंकिता वालावलकर घराबाहेर झाली आहे. कलर्सने नुकत्याच शेअर केलेल्या प्रोमोमुळे सगळेच चकीत झाले आहेत.

या आठवड्यात घरात सगळेच जोडीने राहत होते. अरबाज-आर्या, पॅडी-घन:श्याम अशा जोड्या ‘बिग बॉस’कडून बनवण्यात आल्या होत्या. यावेळी घरात नॉमिनेशन कार्य सुद्धा जोडीनेच पार पडलं होतं. त्यात निक्की तांबोळी, अभिजीत सावंत, वर्षा उसगांवकर आणि अंकिता वालावलकर हे चार सदस्य नॉमिनेट झाले होते. मात्र या आठवड्यात वोटिंग लाइन्स बंद होत्या. त्यामुळे या आठवड्यात कुणीही बाहेर जाणार नाही असं वाटत असतानाच कलर्स मराठीने एक नवा प्रोमो शेअर केला आहे. यात रितेश अंकिता तुमचा प्रवास आज इथेच संपलाय असं सांगतोय. रितेशने जाहीर केल्यावर डीपी, सूरज चव्हाण यांच्यासह अनेकांना अश्रू अनावर होतात. त्यामुळे अंकिताच्या एविक्शनबद्दल ऐकून सर्वांनाच धक्का बसतो.

‘बिग बॉस’ने माहिती दिल्याप्रमाणे अंकिता तिच्या नावाची पाटी घेऊन मुख्य प्रवेशद्वाराकडे येतेय. मुख्य द्वाराकडे सर्वांना शेवटचं गूडबाय म्हणत अंकिता घरची वाट धरणार असल्याचं या प्रोमोमध्ये पाहायला मिळत आहे. हा प्रोमो पाहून नेटकऱ्यांसह अंकिताच्या चाहत्यांना याचा खूप मोठा धक्का बसला आहे. आता नेटकऱ्यांनी हा प्रोमो दिशाभूल करणारा असल्याचं सांगितलं आहे. तिला बाहेर न काढता तिला सिक्रेट रूममध्ये ठेवतील असं प्रेक्षकांचं म्हणणं आहे. यापूर्वीही आधीच्या सीझनमध्ये काही सदस्यांना असं सिक्रेट रूममध्ये ठेवण्यात आलं होतं. त्यामुळे अंकितही सिक्रेट रूममध्ये जाण्याची शक्यता नाकारता येत नाही. मात्र यामुळे टीम बीला मोठा धक्का बसला आहे हे मात्र नक्की.