गणेशोत्सवाच्या एक दिवस आधी बाप्पाच्या दर्शनाला पोहोचले दीपिका- रणवीर; होणाऱ्या बाळाच्या आजी-आजोबांचीही हजेरी

Deepika Padukone Pregnancy: लोकप्रिय बॉलिवूड अभिनेत्री दीपिका पादुकोण लवकरच आई होणार आहे. दीपिका आणि रणवीर लवकरच आई- बाबा होणार आहेत. सप्टेंबर महिन्यात दीपिका तिच्या पहिल्या बाळाला जन्म देणार आहे. त्यामुळे त्यांचे चाहते प्रचंड आनंदी आहेत. तर दुसरीकडे अजूनही दीपिकाचं फोटोशूट सोशल मीडियावर व्हायरल होत आहे. तिने अतिशय सुंदर असं फोटोशूट करत सगळ्यांचं तोंड बंद केलं. आता रणवीर दीपिकाचा एक व्हिडिओ सोशल मीडियावर व्हायरल होतोय. गणपती बाप्पाच्या आगमनाला अवघा एक दिवस बाकी असताना रणवीर आणि दीपिका बाप्पाच्या चरणी लिन झाले आहेत.

उद्या भक्तांच्या घरी गणपती बाप्पाचं आगमन होणार आहे. त्यापूर्वी रणवीर आणि दीपिका दादर येथील सिद्धिविनायक मंदिरात बाप्पाचा आशीर्वाद घेण्यासाठी पोहोचले आहेत. या व्हिडिओमधील त्यांच्या लूकने चाहत्यांचं लक्ष वेधून घेतलं आहे. दीपिकाने हिरव्या रंगाची काठापदराची साडी नेसली आहे. केसांचा बन घातला आहे तर कानात मोठेसे कानातले आहेत. रणवीरने पांढऱ्या रंगाचा कुर्ता परिधान केला आहे. त्यांचा हा व्हिडिओ सध्या सोशल मीडियावर व्हायरल होत आहे. दीपिकाचा गरोदरपणातील ग्लो चेहऱ्यावर स्पष्ट दिसून येत आहे.

दीपिका आणि रणवीर यांनी नुकतंच बांद्रा येथे नव्या घराची खरेदी केली होती. त्यामुळे ते आपल्या नव्या घरात बाळाचं स्वागत करणार असल्याचं बोललं जातंय. तर त्यांच्या कामाबद्दल सांगायचं तर दीपिका शेवटची 'कल्की २८९८ एडी' या चित्रपटात दिसली होती. बाळाला जन्म दिल्यानंतर ती काही महिन्यात पुन्हा कामाला सुरुवात करेल असं सांगितलं जातंय. तर रणवीरच्या सिंघम ३ मध्ये दिसण्याची शक्यता आहे. तो यापूर्वी 'रॉकी और रानी की प्रेम कहानी' मध्ये दिसला होता.