काळ्या चिमणीची राख घावली रे..! जब्या आणि शालूला लागली हळद? राजेश्वरीच्या 'त्या' फोटोमुळे चर्चांना उधाण

'फँड्री' या चित्रपटातून प्रेक्षकांच्या मनाचा ठाव घेणारे जब्या आणि शालू म्हणजेच अभिनेता सोमनाथ अवघडे आणि राजेश्वरी खरात हे प्रेक्षकांचे लाडके आहेत. राजेश्वरी आणि सोमनाथ यांनी आपल्या अभिनयाने प्रेक्षकांची मनं जिंकली होती. 'फॅन्ड्री' हा चित्रपट बॉक्स ऑफिसवर हिट ठरला होता. ते दोघेही सोशल मीडियावर सक्रीय असतात. मात्र आता ते एका वेगळ्याच कारणामुळे चर्चेत आहेत. त्या दोघांचा एक फोटो सोशल मीडियावर व्हायरल होतोय ज्यात ते दोघे चक्क एका मंडपात बसले आहेत आणि त्यांना हळद लागतेय. त्यांचा हा फोटो पाहून आता जब्या आणि शालू खऱ्या आयुष्यात लग्नबंधनात अडकले असल्याचं बोललं जातंय.

राजेश्वरी खरात हिने एक फोटो शेअर केला आहे. ज्यात ती आणि सोमनाथ लग्नमंडपात बसले आहेत. त्यांच्या डोक्याला मुंडावळ्या आहेत. ते दोघेही पाटावर बसलेत आणि त्यांना हळद लावण्याची तयारी होतेय. हा फोटो पाहून सोशल मीडियावर चर्चेला एकच उधाण आलंय. ते दोघे गुपचूप लग्नबंधनात अडकले असल्याचं बोललं जातंय. या फोटोवर नेटकऱ्यांनी कमेंटचा वर्षाव केलाय. हा फोटो शेअर करत अभिनेत्रीने याला “सर सुखाची श्रावणी…” हे गाणं लावलं आहे. मात्र, कॅप्शनमध्ये कसलाही उल्लेख केलेला नाही. त्यामुळे दोघांचं खरंच लग्न आहे की, कुठल्या नव्या प्रोजेक्ट्मधला फोटो शेअर केलाय याबद्दल संभ्रम कायम आहे. तरी नेटकरी मात्र त्यांना भरभरून शुभेच्छा देत आहेत.

एका नेटकऱ्याने लिहिलं, 'हे कधी झालं…'' आणखी एकाने लिहिलं, 'भाऊ चिमटभर राख भेटेल का मला पण. दुसऱ्या नेटकऱ्याने लिहिलं, 'शेवटी जब्याला शालू भेटलीच. जब्या शालूचं प्रेम सफल झालं. हळदीला बोलावलं नाही जब्या तू… आणखी एकाने लिहिलं, 'काळ्या चिमणीची राख मिळाली वाटतं. काळ्या चिमणीच्या राखेने काम केलं शालू झाली की जब्याची. अशा भन्नाट कमेंट्स नेटकऱ्यांनी या फोटोवर केल्या आहेत. मात्र हा फोटो एखाद्या शूटिंगमधला असू शकतो असा अंदाजही बांधण्यात येतोय.