Ashvini Bhave: मला इंडस्ट्रीमधला नवरा नकोच होता... अश्विनी भावेंचा खुलासा; म्हणाल्या- मी ज्या संस्कारात...

Ashvini Bhave Talked On Marriage: मराठी सिनेसृष्टीसोबतच हिंदी चित्रपटांमध्येही आपल्या अभिनयाची कमाल दाखवणाऱ्या अश्विनी भावे यांनी कायमच प्रेक्षकांच्या मनावर अधिराज्य गाजवलं. त्यांनी आपल्या अभिनयाच्या जोरावर प्रेक्षकांची मनं तर जिंकलीच सोबतच त्यांनी आपल्या नृत्यानेही चाहत्यांना भुरळ पाडली. मात्र यशाच्या शिखरावर असताना त्यांनी अचानक लग्नाचा निर्णय घेतला आणि नवऱ्यासोबत त्या परदेशात स्थायिक झाल्या. त्यानंतर त्या अनेक वर्ष अभिनय क्षेत्रापासून दूर होत्या. आता नुकत्याच दिलेल्या मुलाखतीत त्यांनी त्यांच्या लग्नाविषयी भाष्य केलं आहे. मला इंडस्ट्रीमधील नवरा नकोच होता असं त्यांनी सांगितलं.

अश्विनी यांनी नुकतीच आरपार या युट्यूब चॅनेलला मुलाखत दिली. या मुलाखतीत बोलताना त्या म्हणाल्या, 'मी लहानाची मोठी झाले ना ती खूप बाळबोध संस्कारांमध्ये झाले. आणि माझ्या पहिल्या नाटकालाच मी पहिल्यांदा दारूची बाटली पाहिली. मला म्हणजे असं झालं की काय करू. एक आपली वेगळी देहबोली असते. मी खूप वेगळ्या संस्कारांमधून आले होते. आणि मला ते संस्कार सोडावे असं कधीच वाटलं नाही. त्यामुळे मी आजूबाजूला जे पाहिलं किंवा एक वाईट वागणूक देण्याजी किंवा छेडण्याची पद्धत असते. हे सगळं मी इथे पाहिलं.'

अश्विनी पुढे म्हणाल्या, 'मला नाही माहीत का पण मी या इंडस्ट्रीकडे कायम ही माझी कामाची जागा आहे असं बघत आले. म्हणजे माझा स्वभाव होता. मला असं हे कुणी सांगितलं नव्हतं. माझं मीच ठरवलेलं होतं. की भले त्याने माझ्या कामातलं काहीही नसलं पाहिलं तारिकाही फराज पडत नाही. मला तो माणूस म्हणून पटावा, त्याला मी माणूस म्हणून पटावी एवढीच अपेक्षा होती. मला नाही माहीत हे कदाचित ऐकून विचित्र वाटेल की मला इंडस्ट्रीतला नवरा नको होता हे माझं आधीच ठरलेलं.' अश्विनी या सध्या 'घरत गणपती' या चित्रपटात दिसत आहेत. हा चित्रपट २६ जुलै रोजी सिनेमागृहात प्रदर्शित झाला आहे. अश्विनी यांनी यापूर्वी 'ध्यानीमनी', 'कदाचित', 'आजचा दिवस', 'पुरुष', 'वजीर', 'शाब्बास सुनबाई' या चित्रपटांमध्ये काम केलं आहे.