Actress Lost Eyesite: एक चूक महागात पडली! लोकप्रिय अभिनेत्रीच्या कॉर्नियाला दुखापत; डोळ्यांनी दिसणंच झालं बंद

छोट्या पडद्यावरील लोकप्रिय अभिनेत्री जास्मिन भसीन हिच्याशी संबंधित मोठी बातमी आता समोर येते आहे. एका इव्हेंटसाठी केलेली एक गोष्ट अभिनेत्रीला चांगलीच महागात पडली आहे. जास्मिनचा डोळ्यांवर पट्टी बांधलेला एक फोटो सध्या सोशल मीडियावर व्हायरल होतोय. तिच्या डोळ्यातील कॉर्नियाला दुखापत झाली असून तिला दिसणंही बंद झालं आहे. सध्या डॉक्टरांनी तिच्यावर उपचार केले आहेत मात्र तिला झोपण्यासाठीही अडचण येते आहे. तिच्या डोळ्यांवर पट्टी बांधण्यात आली आहे. असं अभिनेत्रीसोबत नेमकं काय घडलंय?

जास्मिनने इटाइम्सला दिलेल्या मुलाखतीत घडलेल्या घटनेची माहिती दिली आहे. याबद्दल बोलताना ती म्हणाली की तिने १७ जुलै रोजी एक इव्हेंट केला होता. त्या कार्यक्रमासाठी ती दिल्लीला गेली होती. या कार्यक्रमासाठी तिने डोळ्यात लेन्स घातल्या होत्या. पण त्यानंतर तिच्या डोळ्यांना त्रास होऊ लागला. डोळे जळजळू लागले. तिला खूप त्रास होऊ लागला. त्यानंतर तिने चष्मा घालून आपलं काम पूर्ण केलं. तो संपूर्ण कार्यक्रम तिने पार पाडला. मात्र जेव्हा हे दुखणं वाढलं आणि असह्य झालं तेव्हा ती ताबडतोब डॉक्टरकडे गेली.

डॉक्टरकडे गेल्यानंतर तिला माहीत पडलं की तिच्या डोळ्यांच्या कॉर्नियाला दुखापत झाली आहे. त्यानंतर ती मुंबईत आली आणि उपचार सुरू केले. सध्या तिच्या डोळ्यांवर पट्टी बांधली आहे मात्र अजूनही डोळ्यांना म्हणावा तसा आराम मिळालेला नाही. मिळालेल्या माहितीनुसार, पुढच्या ४- ५ दिवसात तिचे डोळे पूर्वीसारखे होतील मात्र त्यासाठी तिला खूप काळजी घ्यावी लागणार आहे. जास्मिन यापूर्वी 'टशन-ए-इश्क' और 'दिल से दिल तक' या टीव्ही शोमध्ये दिसली होती.