Kiran Rao: आमिर खानशी घटस्फोट घेतल्यानंतर कसं आयुष्य जगतेय किरण राव; खुलासा करत म्हणाली- तीन वर्ष झाली पण...

बॉलिवूडचा मिस्टर परफेक्शनिस्ट आमिर खान गेल्या काही महिन्यांमध्ये त्याच्या चित्रपटांपेक्षा त्याच्या वैयक्तिक आयुष्यासाठी चाहत्यांमध्ये चर्चेत होता. त्याने आणि त्याची दुसरी पत्नी किरण राव यांनी घटस्फोट घेतला होता. त्यांनी तीन वर्षांपूर्वी घटस्फोटाची बातमी देत सगळ्यांना चकीत केलं होतं. ते वेगळे होत आहेत यावर अनेकांचा विश्वास बसत नव्हता. मात्र आपल्यातील मतभेदांमुळे आपण वेगळे होत आहोत असं त्यांनी सांगितलं होतं. आता घटस्फोटानंतर आपलं आयुष्य कसं आहे यावर किरण राव व्यक्त झाली आहे. आपण या घटस्फोटानंतर खूप आनंदी आहोत असं तिचं म्हणणं आहे.

किरणने नुकतंच 'लापता लेडीज' या चित्रपटाचं दिग्दर्शन केलं होतं. त्यासाठी तिची प्रचंड प्रशंसा करण्यात आली. तिचं खूप कौतुक झालं. आता 'फेय डिसुझा'ला दिलेल्या मुलाखतीत बोलताना किरणने तिच्या घटस्फोटानंतरच्या आयुष्याबद्दल सांगितलं आहे. याबद्दल बोलताना किरण म्हणाली, 'मला वाटतं नात्याला प्रत्येकवेळी नव्याने नाव देण्याची गरज आहे. कारण जसे जसे आपण मोठे होतो तसे माणसाची रूपं बदलतात. आपण बदलतो. आपल्याला वेगवेगळ्या गोष्टींची गरज असते आणि आपल्याला वाटतं की या व्यक्तीकडून त्या गरजा पूर्ण होती. मी प्रामाणिकपणे सांगते या माणसाने माझ्या सगळ्या गरजा पूर्ण केल्या. हा एक आनंदी घटस्फोट आहे.'

ती पुढे म्हणाली, 'मला वाटतं की एकटेपण हीच ती भावना आहे ज्याची अनेकांना चिंता असते जेव्हा त्यांच्या आयुष्यातील एखादा व्यक्ती निघून जातो किंवा घटस्फोट होतो. पण मला अजिबात एकटेपणा वाटत नाहीये. मला दोन्ही कुटुंबाचा खूप पाठिंबा मिळाला आहे. त्याचं कुटुंब आणि माझं कुटुंब. यानंतर केवळ चांगल्या गोष्टी होतील. माझ्या मुलामुळे मला मुळीच एकटेपण वाटत नाही. माझ्यात आणि आमिरमध्ये खूप प्रेम होतं. खूप सन्मान होता. हसू होतं, मस्ती होती. आम्ही एकमेकांसाठी होतो. मी त्यांना गमावू इच्छित नव्हती. पण जे झालंय ते चांगलं झालंय.'