बिग बॉस मराठीमध्ये एंट्री करताच कोकण हार्टेड गर्लने दिली प्रेमाची कबुली, म्हणते- आपण लग्न करायचं ठरवलं अन्

Kokan Hearted Girl boyfriend: सोशल मीडियावरील लोकप्रिय इन्फ्लुएन्सर आणि युट्यूबर अंकिता वालावलकर हिने 'बिग बॉस मराठी ५' मध्ये एंट्री केली आहे. या सीझनमध्ये कोकण हार्टेड गर्ल राडा घालायला सज्ज झाली आहे. आपण इथे कोणताही गेमप्लॅन घेऊन आलेलो नाही पण ट्रॉफी घेऊन जाण्याचा नक्की प्रयत्न करू असं ती म्हणाली. मात्र एकीकडे तिने बिग बॉसच्या घरात एंट्री केली आहे तर दुसरीकडे तिने आपल्या प्रेमाची कबुली दिली आहे. तिने एक पोस्ट करत तिच्या प्रेमाबद्दल सांगितलं आहे. अंकिताने त्या व्यक्तीसोबत लग्न करायचं ठरवलं आणि तेव्हाच तिला बिग बॉस मराठीची ऑफर अली. तेव्हा या कार्यक्रमासाठी त्याच व्यक्तीने तिला हिंमत दिली असंही तिने लिहिलं.

ही पोस्ट अंकिताने अंकिताने बिग बॉसच्या घरात येण्यापूर्वी लिहिली होती. आता ती पोस्ट तिच्या टीमने शेअर केली आहे. या पोस्टमध्ये तिने लिहिलं, 'डिअर कोकण हार्टेड बॉय, रात्री २ वाजता यशस्वी भव: हे गिफ्ट घेऊन येणं रोमँटिक समजू की काळजी? कारण बिग बॉसमधे जाण्यासाठी २ दिवस बाकी उरलेत फक्त.. खरंतर आयुष्यात कुणी यावं हे तुमच्या कपाळावरची नशीबाची रेषा सांगते, पण तुमच्या आयुष्यात कुणी थांबायचं हे तुमचे ह्रदय ठरवते.तू माझ्या आयुष्यात आलास आणि मला आयुष्याकडे कसं बघायचं हे शिकवलस.तुझे शब्द माझी ताकद आहेत. तु हिमतीने माझ्यासोबत उभा आहेस हे बघुन आई पण निश्चिंत आहे.तुझी सगळी वाक्य लक्षात ठेऊन हया नवीन प्रवासाला सुरुवात करतेय.'

तिने पुढे लिहिलं, 'जेव्हा लग्न करु अस आपण ठरवलं आणि बिग बॉसची ऑफर आली,माझ्यासाठी इकडे आड तिकडे विहीर अशी परिस्थिती होती त्यात मी ठरवलं की तुला जे योग्य वाटेल ते करेन पण तू म्हणालास “माझा विचार नको करूस ,मी आजही आहे ,उद्याही असेन पण तू मेंटली नीट राहणार असशील तर जा” ”लवकर ये पण जिंकुन ये,आलीस की लग्न करु फक्त जशी आहेस तशीच वाग,जिंकण्यासाठी खोटं वागु नकोस, हरलीस तरी चालेल“ हे सगळं लक्षात ठेऊन जातेय,लवकरच येईन पण छान राहुन येईन,तू तयारीला लाग 😅तुझ्यासोबत १९५ देश फिरायचे आहेत. फुलांची खूप आठवण येईल. येते. तुझीच, गुणी पोरगी.'

अंकिताची ही पोस्ट सध्या सोशल मीडियावर व्हायरल होतेय. चाहते तिच्यावर लाइक आणि कमेंटचा वर्षाव करत आहेत.