गृहप्रवेशाच्या पूजेमध्ये हलगीच्या तालावर थिरकली नम्रता संभेराव; नवऱ्याला नाचताना पाहून नेटकरी म्हणाले-

'महाराष्ट्राची हास्यजत्रा'(Maharashtrachi Hasyajatra) मधून घराघरात पोहोचलेली लोकप्रिय अभिनेत्री नम्रता संभेराव (Namrata Sambherao) प्रेक्षकांची लाडकी आहे. तिने आपल्याअभिनयाने प्रेक्षकांना आपलंसं केलं. तिची लाली तर घराघरात गाजतेय. तिच्या चाहत्यांची संख्या प्रचंड मोठी आहे. ती सोशल मीडियावरही सक्रीय असते. तिने फक्त छोट्या पडद्यावरच नाही तर अनेक चित्रपटातही आपल्या अभिनयाचा ठसा उमटवला आहे. नम्रता चाहत्यांसोबत कायम जोडलेली असते. सध्या नम्रताचा एक व्हिडिओ सोशल मीडियावर व्हायरल होतोय ज्यात ती हलगीच्या तालावर नाचताना दिसतेय. हा व्हिडिओ तिने स्वतः शेअर केला आहे. तिला पाहून नेटकरीही भलतेच खुश झाले आहेत.

नम्रताने महिन्याभरापूर्वी गावाला नवं घर बांधलं होतं. नुकताच तिने या घरात गृहप्रवेश केला होता. तिने घराच्या गृहप्रवेशावेळी केलेल्या पूजेचे फोटो चाहत्यांसोबत शेअर केले होते. या पूजेला त्यांनी जागरण गोंधळही घातला होता. आता तिने या कार्यक्रमातील एक व्हिडिओ शेअर केला आहे. यात नम्रता आणि तिचे पती हलगीच्या तालावर नाचताना दिसत आहेत. नम्रता तर जबरदस्त ठुमके लगावताना दिसतेय. तर आजूबाजूचे कौतुकाने त्या दोघांकडेही पाहत आहेत. अगदी १५ ते २० सेकंदाच्या या व्हिडिओने सोशल मीडियावर एकच धुमाकूळ घातला आहे. त्यांचा हा रांगडा अंदाज प्रेक्षकांच्या पसंतीस उतरत आहे.

नेटकरी त्यांच्यावर कौतुकाचा वर्षाव करत आहेत. एकाने कमेंट करत लिहिलं, 'वाहवाह दोघेही इतके सुंदर नाचत आहेत. बघून भारी वाटलं. दुसऱ्याने लिहिलं, 'एकदम झकास. आता कसे जुन्नरचे वाटतात… आपली संस्कृती आपली परंपरा.' तिसऱ्याने लिहिलं, 'नम्रता तू खऱ्या अर्थाने संस्कृती जपतेयस. खूप छान.' या व्हिडीओमध्ये नम्रता व योगेश यांचा मराठमोळा अंदाज पाहायला मिळत आहे. नम्रताने खास सुंदर साडी नेसून, नाकात नथ, केसात गजरा असा लूक केला होता. या व्हिडीओमध्ये तिच्या लेकाची झलक देखील पाहायला मिळतेय.