दीड वर्षात ७ खून; 'मानवत मर्डर्स'मध्ये मराठी कलाकारांची फौज; 'अबीर गुलाल' फेम अभिनेत्रीही झळकणार

मराठी सिनेसृष्टी आता कात टाकते आहे. नवनवीन प्रयोग केले जात आहेत. मराठी सिनेमा राष्ट्रीय पातळीवर आपली मोहोर उमटवतोय. त्यात आता एक जबरदस्त वेबसीरिज प्रेक्षकांच्या भेटीला येत आहे. खून आणि रहस्यांनी भरलेली ही वेबसीरिज मराठी कलाकारांची फौज घेऊन येतेय. सोनी लिव्हवर लवकरच एक थ्रिलर वेब सीरिज प्रेक्षकांना पाहायला मिळणार आहे. 'मानवत मर्डर्स' असं या सीरिजचं नाव असून यात मर्डर मिस्ट्री दाखवण्यात येणार आहे. या सीरिजचा ट्रेलर नुकताच प्रदर्शित करण्यात आला आहे. या ट्रेलरमध्ये अनेक मराठी कलाकारांचा फर्स्ट लूक समोर येतो आहे. त्यांना पाहून चाहतेही थक्क झाले आहेत.

मानवत या गावात होणाऱ्या सात खुनांचं हे रहस्य सोडवण्यासाठी एका नव्या पोलीस इन्स्पेक्टरला त्या गावात पाठवण्यात आलं आहे. या खुनांमागे कुणाचा कोणता वैयक्तिक हेतू आहे याचा अन्दाज नसला तरी संशयाची सुई अनेकांवर आज. हा इन्स्पेक्टर खुनाच्या तळाशी जाणार, खुन्याचा शोध लावणार की स्वतः कोणत्या अडचणीत सापडणार हे पाहण्यासाठी ही वेबसीरिज पाहावी लागेल. ही वेबसीरीज ४ ऑक्टोबर रोजी सोनी लिव्हवर प्रदर्शित होणार आहे. मात्र त्यापूर्वी या सीरिजमधील मराठी कलाकारांच्या लूकने सगळ्यांचं लक्ष वेधून घेतलं आहे. या सीरिजमध्ये मराठी कलाकारांची फौज आहे.

यात ट्रेलरमध्ये सुरुवातीला अभिनेत्री सोनाली कुलकर्णी दिसतेय. त्यानंतर अभिनेते मकरंद अनासपुरे दिसत आहेत. त्यांचा हा लूक पाहून प्रेक्षक चकीत झाले आहेत. तर सईने सगळ्यांचं लक्ष वेधून घेतलं आहे. सईच्या लूकने सगळ्यांच्या भुवया उंचावल्या आहेत. तर यांच्यासोबतच अभिनेते आशुतोष गोवारीकर या चित्रपटात इन्स्पेक्टरच्या भूमिकेत दिसतायत. तर कलर्स मराठीवरील मालिका 'अबीर गुलाल' मधील श्री म्हणजेच अभिनेत्री पायल जाधवदेखील या सीरिजमध्ये दिसतेय. त्यामुळे नेटकरी या सीरिजसाठी प्रचंड उत्सुक आहेत. ही सिरीज ४ ऑक्टोबर रोजी सोनी लिव्हवर प्रदर्शित होणार आहे.