आधी सगळे नावं ठेवत होते आता मात्र... 'हंटर' मधील 'त्या' बोल्ड सीनवरबद्दल पहिल्यांदाच बोलली सई ताम्हणकर

Entertainment news : बॉलिवूड अभिनेत्री सई ताम्हणकर हिने तिच्या अभिनयाने प्रेक्षकांना वेड लावलं. तिच्या सौंदर्याचे अनेक चाहते आहेत. सईने तिच्या करिअरमध्ये अनेक उत्कृष्ट भूमिका साकारल्या आहेत. मात्र यातीलच काही भूमिकांसाठी सईला ट्रोलही केलं गेलंय. असाच एक चित्रपट 'हंटर'. या चित्रपटातील भूमिकेसाठी तिला चाहत्यांच्या नाराजीला सामोरं जावं लागलं होतं. या चित्रपटात तिने अनेक बोल्ड सीन दिले होते. आता नुकत्याच दिलेल्या मुलाखतीत तिने या चित्रपटावर भाष्य केलंय. आधी जे चित्रपटाला नावं ठेवत होते त्यांना नंतर याबद्दल काहीच वाटत नाहीये असं ती म्हणाली.

सईने नुकतीच मिस मालिनी या युट्यूब चॅनेलला मुलाखत दिली. या मुलाखतीत बोलताना सई म्हणाली, ''मी या सिनेमात जे काही केलं ते माझे मित्र-मैत्रिणी आणि कुटुंबासाठी पचवणं जरासं कठीण होतं. थोड्याफार प्रमाणात, हो. मात्र काही वर्षांनी ते सर्वजण याबद्दल ओके आहेत. जसं मी आधी म्हणाले, तो सिनेमा काळाच्याही पुढे असणारा सिनेमा होता. कमेंटबद्दल बोलायचे झाल्यास मला त्यातील फोटोंवरुन खूप कमेंट येतात. त्यातील काही मजेशीर आहेत, काही मला खूपच आवडतात आणि काही कमेंट मी रिपोस्ट करते.'

ती पुढे म्हणाली, 'हंटर असा सिनेमा होता जो त्यावेळच्या काळाच्याही पुढे होता. आम्हाला याची कल्पनाही नव्हती की, "हंटर" एक कल्ट सिनेमा ठरेल. मी एकदा हिमाचल प्रदेशमध्ये गेले होते, तिथे दोन पंजाबी मुलं होती. त्यांनी मला विचारले की मी तीच महिला आहे का, जी हंटरमध्ये होती. तेव्हा मी खूपच आश्चर्यचकित झालेले.' हंटर या चित्रपटात सईने एका विवाहित महिलेची भूमिका साकारली होती. यात तिचं अफेअर तिच्यापेक्षा कमी वयाच्या मुलासोबत असतं. त्यांचे इंटिमेट सीन तेव्हा प्रचंड चर्चेत होते. या चित्रपटात सई, गुलशन, राधिका यांच्यासह सागर देशमुख, वीरा सक्सेना, रेचल डिसूझा, वैभव तत्ववादी, नीना कुलकर्णी, रवींद्र मंकणी अशी स्टारकास्ट होती. तर साई नुकतीच 'मानवत मर्डर्स' मध्ये दिसली होती.