ऐटीत बसलाय, जराही भीती नाही; काळवीट प्रकरणानंतर अधिकाऱ्यांशी कसा वागत होता सलमान खान, जुना व्हिडिओ व्हायरल

बॉलिवूड अभिनेता सलमान खान गेले कित्येक दिवस सोशल मीडियावर चर्चेत आहे. लॉरेंस बिष्णोई याच्याकडून सतत अभिनेत्याला जीवे मारण्याच्या धमक्या मिळत आहेत. अनेक नेटकरी यावर आपली प्रतिक्रिया देत आहेत. मात्र आता सोशल मीडियावर सलमानचा एक व्हिडिओ व्हायरल होतोय ज्यात तो वन अधिकाऱ्यांसोबत उद्धटपणे बोलताना दिसतोय. हा व्हिडिओ तेव्हाचा आहे जेव्हा सलमानला काळवीटाची हत्या केल्या प्रकरणी अटक करण्यात आली होती. या व्हिडिओमधले सलमानचे नखरे पाहून त्याला त्याने केलेल्या कृत्याचा जराही पश्चाताप नसल्याचं स्पष्ट दिसतंय. उलट तो अधिकाऱ्यांसमोर अगदी बिनधास्तपणे बसलेला दिसतोय.

'हम साथ साथ हैं' या चित्रपटाच्या शूटिंगच्या वेळी सलमानने बिष्णोई समाजाचे देवता मानलं जाणाऱ्या काळवीट प्राण्याची शिकार केली होती. तेव्हा प्रत्यक्षदर्शींच्या सांगण्यावरून त्याला अटक करण्यात आली होती. सोशल मीडियावर व्हायरल होणारा हा व्हिडिओ राजस्थान येथील असल्याचं सांगण्यात येतंय. एका ट्वीटर युझरने हा व्हिडिओ ट्विट केलाय. यात वन अधिकारी सलमानचा जबाब घेत आहेत. मात्र सलमान त्यांच्यासमोर अगदी ऐटीत बसलाय. आपण एखादा गुन्हा केलाय याचा जराही लवलेश त्याच्या चेहऱ्यावर नाही. तो मस्त खुर्चीवर पायावर पाय टाकून बसलाय. तर दुसऱ्या जबाब देणाऱ्या व्यक्तीकडॆ रागाने बाघतोय.

जेव्हा अधिकारी त्याला सहा पानांवर सही करायला सांगतात तेव्हाही तो अधिकाऱ्यांशी हुज्जत घालताना दिसतोय. आपण खूप मोठे कलाकार आहोत हे जाणून असलेला सलमान त्या वन अधिकाऱ्यांना अगदी तुच्छतेने वागवताना दिसतोय. त्याचा हा व्हिडिओ सध्या सोशल मीडियावर व्हायरल होतोय. त्यावर नेटकरीही प्रतिक्रिया देताना दिसतायत.