बाल्कनीच्या कठड्यावर पाय मोकळे सोडून ती... दिव्या भारती कशी पडली? २१ वर्षानंतर अभिनेत्रीचा मोठा खुलासा

Latest Bollywood News: ५ एप्रिल १९९३ रोजी संपूर्ण देशाला हादरवणारी घटना घडली होती. १९ वर्षीय दिव्या भारती जी आपल्या अभिनयाच्या आणि सौंदर्याच्या जोरावर बॉलिवूडवर राज्य करत होती तिचा अपघाती मृत्यू झाला होता. दिव्या तिच्या घराच्या बाल्कनीमधून पडली आणि तिचा मृत्यू झाला. ती पाचव्या मजल्यावर राहत होती. तेव्हा दिव्या पडली नाही तर तिला मारण्यात आलंय असं म्हटलं गेलं. तिच्या मृत्यूचा आरोप दिव्याचे पती साजिद नाडियाडवाला यांच्यावर करण्यात आला. मात्र आता अभिनेत्री गुड्डी मारुती हिने हे सगळे आरोप खोटे असल्याचं म्हटलं आहे.

आम्ही एकत्र पार्टी करत होतो

'शक्तिमान' मालिकेतील अभिनेत्री गुड्डी मारुती हिने सिद्धार्थ कननला दिलेल्या मुलाखतीत म्हटलं, 'दिव्या एक चांगली मुलगी होती पण खूप मस्तीखोर होती. ती तिचा प्रत्येक दिवस असा जगायची जसा तो तिचा शेवटचा दिवस आहे. आम्ही 'शोला और शबनम' या चित्रपटाचा शूटिंग करत होतो. तेव्हा ती साजिद नाडियाडवालाशी भेटायची. ५ एप्रिलला तिचं निधन झालं आणि ४ तारखेला माझा वाढदिवस होता. आम्ही सगळे एकत्र पार्टी करत होतो. गोविंदा, दिव्या, साजिद आणि अनेक लोक होते. पण मला असं वाटलं की ती उदास होती. तिचं एक शूट होतं पण तिला जायचं नव्हतं.'

उंचीची तिला मुळीच भीती नव्हती

गुड्डीने अभिनेत्रीबद्दल अशी घटना सांगितली जी ऐकून सगळेच चकीत झाले. गुड्डी म्हणाली, 'दिव्या जुहूच्या पाचव्या मजल्यावर राहायची. जेव्हा मी एक दिवस जवळच्या दुकानात आयस्क्रीम घ्यायला जात होते तेव्हा माझ्या नावाने कुणीतरी जोरजोरात ओरडत असल्याचं ऐकू आलं. मी जेव्हा वर पाहिलं तेव्हा दिव्या तिच्या बाल्कनीमध्ये कठड्यावर पाय मोकळे सोडून बसलेली. मी तिला म्हटलं हे सेफ नाहीये. आत जा. ती म्हणाली काही नाही होणार. तिला पाहून मी घाबरले होते पण तिला उंचीची मुळीच भीती नव्हती.'

आणि दिव्या वरून पडली

दिव्याच्या मृत्यूच्या दिवशी नेमकं काय घडलं हे सांगताना गुड्डी म्हणाली, 'ती तिच्या खिडकीमधून खाली वाकलेली हे पाहायला की साजिदची गाडी आली की नाही, आणि तेव्हाच ती पडली. तिथे डिझायनर नीता लुल्लादेखील होत्या. त्यांनी दिव्याला पडताना पाहिलं. तिच्या आईची परिस्थिती खूप वाईट होती. साजिद तर... त्याचीही परिस्थिती खूप वाईट होती. तो घरीच नव्हता जेव्हा ही घटना घडली.'