श्रद्धा कपूरने नाकारली 'पुष्पा २' ची ऑफर; आता अल्लू अर्जुनसोबत आयटम नंबरमध्ये थिरकणार ही अभिनेत्री

अल्लू अर्जुनच्या 'पुष्पा 2' या चित्रपटाची सर्वजण आतुरतेने वाट पाहत आहेत. सुकुमार दिग्दर्शित 'पुष्पा: द रुल' अखेर 5 डिसेंबर 2024 रोजी थिएटरमध्ये प्रदर्शित होणार आहे. तुम्हाला 2021 मध्ये रिलीज झालेल्या 'पुष्पा: द राइज' मधील समंथा रुथ प्रभूचा आयटम नंबर 'ऊ अंटावा' आठवत असेल. या गाण्याने चाहत्यांना वेड लावलं होतं. हे गाणं आजही अनेकांचं आवडतं आहे. 'पुष्पा 2'मध्येही असाच आयटम नंबर असल्याची चर्चा अनेक दिवसांपासून सुरू होती. पण या गाण्यात सामंथा नसणार आहे. या डान्स नंबरसाठी जान्हवी कपूरपासून ते श्रद्धा कपूरपर्यंतची नावं चर्चेत होती. मात्र श्रद्धाने या गाण्याला नकार दिलाय. आता एक दुसरीच अभिनेत्री अल्लू अर्जुनसोबत ठुमके लागवताना दिसणार आहे.

'स्त्री २'च्या अभूतपूर्व यशानंतर 'पुष्पा २' च्या मेकर्सनी श्रद्धा कपूरला चित्रपटात डान्स नंबरसाठी विचारलं होतं. मात्र आता मिळालेल्या माहितीनुसार, अल्लू अर्जुनच्या या चित्रपटात काम डान्स करण्यासाठी श्रद्धाने नकार दिलाय. आता ही संधी दुसऱ्या अभिनेत्रीला मिळाली आहे. ही अभिनेत्री आहे लोकप्रिय दाक्षिणात्य कलाकार श्रीलीला. मेकर्सने श्रीलीलाला पुष्पा २' च्या खास गाण्यासाठी निवडलंय. त्यांनी याचं कारणही सांगितलंय. डेक्कन क्रॉनिकलने दिलेल्या माहितीनुसार, अल्लू अर्जुन एक उत्कृष्ट डान्सर आहे. आणि खूप कमी लोक त्याच्यासोबत गती आणि परफेक्शनने डान्स करू शकतात. श्रीलीला खूप चांगली डान्सर आहे. त्यामुळे तिची निवड करण्यात आली आहे.

श्रीलीलाने यापूर्वी महेश बाबूसोबतच्या 'गुंटूर करम' या चित्रपटातील 'कुरिची मदाथापेटी' मध्ये डान्स केला होता. तिला पाहून चाहते फिदा झाले होते. तिच्या नृत्याचं प्रचंड कौतुक झालं होतं. आता श्रीलीलाला 'पुष्पा २' मध्ये झळकण्याची संधी मिळाली आहे. मात्र यासाठी तिने तब्बल २ कोटी मानधन मागितल्याची माहिती आहे. मानधनाची बाब वगळली तर श्रीलीला आता पुष्पा २,मध्ये दिसणार हे निश्चित झालंय.