Shreya Bugde: तू निलेश साबळेसोबत का गेली नाहीस? श्रेया बुगडेने सांगितली तिची बाजू, म्हणते- प्रत्येकाने स्वतंत्र निर्णय...

Shreya Bugde Open Up About Nilesh Sable: 'चला हवा येऊ द्या' या कार्यक्रमातून घराघरात पोहोचलेली अभिनेत्री म्हणजे श्रेया बुगडे. आपल्या अभिनयाने तिने प्रेक्षकांना आपलंसं केलं. तर तिच्या वेगवेगळ्या कलाकारांच्या मिमिक्रीने तर चाहत्यांना अक्षरशः वेड लावलं. तिने इंडस्ट्रीत स्वतःचं वेगळं स्थान निर्माण केलं. मात्र 'चला हवा येऊ द्या' बंद झाल्यानंतर तिने काही काळ ब्रेक घेतला होता. आता ती पुन्हा एकदा नव्या जोमाने कामाला लागली आहे. आता नुकत्याच दिलेल्या मुलाखतीत तिने निलेश साबळेच्या नव्या कार्यक्रमात न जाण्याचं कारण सांगितलं आहे. आपल्याला हिंदी कार्यक्रमाची देखील ऑफर होती असं ती म्हणाली आहे.

'चला हवा येऊ द्या' नंतर निलेश कलर्स मराठीवरील 'हसताय ना हसायलाच पाहिजे' या कार्यक्रमात दिसला. त्यात भाऊ कदम, ओंकार भोजने यांची एंट्री झाली. तर कुशल बद्रिके हिंदी कार्यक्रमात गेला. तू निलेश साबळेसोबत का गेली नाहीस असा प्रश्न विचारल्यावर श्रेया म्हणाली, '’चला हवा येऊ द्या’ बंद झाल्यानंतर प्रत्येकाने स्वतंत्रपणे निर्णय घेतले. मी झी मराठी वाहिनीबरोबर कॉन्ट्र्ॅक्टमध्ये होते. त्यामुळे मी निलेशच्या शोमध्ये जाऊ शकले नाही. ‘चला हवा येऊ द्या’ बंद झाल्यानंतर सगळ्यांनाच एक ब्रेक होता. या ब्रेकमध्ये काय काय करायचं ते ठरवलं. या काळात मला एक हिंदी शोसाठी देखील विचारण्यात आलं. तो देखील मी केला नाही.'

पुडझे श्रेया म्हणाली, 'कारण मला वाटलं की, खरंच मला एका ब्रेकची गरज होती. लगेच तशाच भूमिका करणं हे माझ्याकडून होणारं नव्हतं. त्यासाठी मी रिफ्रेश झालेली नव्हते. तेव्हा मी विचार केला की, त्या ठिकाणी गेल्यावरही मी काही नवीन करू शकणार आहे का? की पुन्हा तसंच काही करणार आहे. त्यामुळे थोडा काळ थांबून पुन्हा नव्याने नवीन पात्र किंवा काम करावंस वाटलं किंवा काहीच नाही तर किमान कोऱ्या पाटीने तरी मला काम करायचं होतं त्यामुळे मी तो ब्रेक घेतला.' श्रेयाने नुकतंच दादर येथे तिचं नवीन हॉटेल सुरू केलं आहे.