Sonalee Kulkarni: बाइकवर स्वार, मागे तिरंगा; स्वातंत्र्यदिन साजरा करण्यासाठी खास ठिकाणी पोहोचली सोनाली कुलकर्णी

Sonalee Kulkarni In Ladakh: ७८ वर्षांपूर्वी आजच्याच दिवशी भारताला स्वातंत्र्य मिळालं होतं. आज १५ ऑगस्ट सगळीकडे मोठ्या उत्साहात साजरा होतोय. भारतीय देशभक्तीने भारावले आहेत. शाळा, ऑफिस सगळीकडे मोठ्या अभिमानाने तिरंगा फडकावला जातोय. अनेक कलाकारही सोशल मीडियावरून आपल्या चाहत्यांना स्वातंत्र्यदिनाच्या शुभेच्छा देत आहेत. छोट्या आणि मोठ्या पडद्यावरील कलाकार फोटो शेअर करत आपल्या भावना व्यक्त करत आहेत. अशातच लोकप्रिय मराठी अभिनेत्री सोनाली कुलकर्णीने शेअर केलेल्या पोस्टने चाहत्यांचं लक्ष वेधून घेतलं आहे. यावर्षीचा स्वातंत्र्यदिन साजरा करण्यासाठी थेट लडाखला पोहोचली आहे.

सोनालीने प्रत्येक चित्रपटात उत्कृष्ट कामगिरी करत चाहत्यांचं मन जिंकलं. आता तिने अत्यंत हटके पद्धतीने चाहत्यांना स्वातंत्र्यदिनाच्या शुभेच्छा दिल्या आहेत. सोनाली दरवर्षी काहीतरी नवीन करण्याचा प्रयत्न करते. यावर्षी ती थेट लडाखला पोहोचली आहे. तिथले काही फोटो आणि व्हिडिओ तिने चाहत्यांसोबत शेअर केले आहेत. तिने बाइकवरचे फोटो शेअर करत 'हर घर तिरंगा' म्हणत शुभेच्छा दिल्या आहेत. यात ती बाइकवर दिसते आहे आणि पाठीमागे तिरंगा लावला आहे. ती सध्या कुटुंबासोबत लडाखच्या ट्रिपवर आहे. तिथे ती थांग या गावात गेली आहे जे पाकिस्तान ऑक्युपाइड काश्मीरच्या आधीचं गाव आहे.

हे गाव आपल्या सैन्याने १९७२ च्या युद्धात परत मिळवलं होतं. तिने तिथल्या श्योक नदीचे काही फोटोही शेअर केले आहेत. तिने आईसोबत तिथल्या गुरुद्वाराला देखील भेट दिली आहे. तिचे हे फोटो सध्या सोशल मीडियावर व्हायरल होत आहेत. सोनालीच्या कामाबद्दल सांगायचं तर ती सध्या सन मराठीच्या 'होऊ दे चर्चा' कार्यक्रमात दिसत आहे. ती या कार्यक्रमाचं सूत्रसंचालन करत आहे.