Sonu nigam: याला म्हणतात संस्कार! सोनू निगमने सगळ्यांसमोर धुतले आशा भोसले यांचे पाय; नेटकऱ्यांचा कौतुकाचा वर्षाव

बॉलिवूडचा लोकप्रिय गायक सोनू निगम याने आपल्या आवाजाने श्रोत्यांना आपलंसं केलं. चाहते त्याच्यावर भरभरून प्रेम करतात. आता त्याचा एक व्हिडिओ समोर येतोय जो पाहून नेटकरी त्याचं कौतुक करतायत. या व्हिडिओमध्ये सोनू दिग्गज गायिका आशा भोसले यांचे पाय धुताना दिसत आहे. त्यांचे पाय धुवून तो आपल्या कपाळाला लावतो. हे पाहून नेटकरी त्याच्या वागण्याचं आणि संस्कारांचं कौतुक करताना दिसतायत.

लोकप्रिय बॉलिवूड गायिका आशा भोसले यांनी नुकतंच त्यांचं आत्मचरित्र 'स्वरस्वामीनी' हे पुस्तक प्रकाशित केलं. या पुस्तकाच्या प्रकाशन सोहळ्याला बॉलिवूडमधील अनेक कलाकार आणि गायक उपस्थित होते. या कार्यक्रमात सोनू यांनी आशा भोसले यांना दिलेला मान पाहून सगळेच भारावून गेले. बॉलिवूडमध्ये अशा गोष्टी कमी पाहायला मिळतात असं म्हणत नेटकऱ्यांनी सोनूचं कौतुक केलं. या कार्यक्रमाचा व्हिडिओ सध्या सोशल मीडियावर व्हायरल होतोय ज्यात तो आपल्या पूज्य गुरूंची पूजा करताना दिसतो आहे.

सोनू आशा यांच्या समोर बसतो. एका भांड्यात त्यांचे पाय ठेवतो. गुलाबाच्या पाकळ्या टाकलेल्या पाण्याने त्यांचे पाय धुतो आणि त्यांच्या पायावर डोकं ठेवून आशीर्वाद घेतो. त्यांच्या पायाचं चुंबन घेतो. जणू तो आपल्या मंदिरातल्या देवाची पूजा करतो आहे तशी तो आशा यांची मनापासून पूजा करताना दिसतोय. त्याचा हा भाव पाहून नेटकरी त्याच्यावर फिदा झाले आहेत. हे करताना तो म्हणाला, 'आज शिकायला खूप साधन आहेत पण जेव्हा शिकायला काहीच नव्हतं तेव्हा लताजी आणि आशाजी होत्या.'

काही नेटकरी मात्र त्याच्या या वागण्याला खोटं ठरवत आहेत. तो हे सगळं फक्त दिखाव्यासाठी करत आहे असं म्हणत आहेत. मात्र अनेकांना त्याचं हे वागणं आवडलं आहे. हा व्हिडिओ सध्या नेटकऱ्यांमध्ये व्हायरल होतोय.