Varalaxmi Wedding: लोकप्रिय दाक्षिणात्य अभिनेत्रीने पंतप्रधान मोदींना दिलं लग्नाचं आमंत्रण; शेअर केले खास फोटो

Varalaxmi Sarathkumar Wedding:लोकप्रिय दाक्षिणात्य अभिनेत्री वरलक्ष्मी सरथकुमार ही प्रेक्षकांची अत्यंत लाडकी आहे. ती सोशल मीडियावरही सक्रीय असते. वरलक्ष्मीने नुकतेच शेअर केलेले काही फोटो आणि व्हिडिओ सध्या सोशल मीडियावर चर्चेत आहेत. त्याचं कारण म्हणजे वरलक्ष्मीने घेतलेली पंतप्रधान नरेंद्र मोदी यांची भेट. वरलक्ष्मी लवकरच बोहोल्यावर चढणार आहे. त्यामुळे आपल्या लग्नाची पत्रिका देण्यासाठी तिने पंतप्रधानांची भेट घेतली. तिने आपल्या लग्नासाठी त्यांना आमंत्रित केलं आहे.

मार्च महिन्यात वरलक्ष्मीचा निकोलाई सचदेव याच्यासोबत साखरपुडा पार पडला होता. आता ती लवकरच लग्नबंधनात अडकणार आहे. आपल्या लग्नाचं आमंत्रण देण्यासाठी तिने सहकुटुंब मोदींची भेट घेतली. या फोटोंमध्ये तिच्या होणाऱ्या पतीसोबतच तिचे वडील राजकारणी आणि अभिनेते असलेले आर सरथकुमार दिसत आहेत. सोबतच अभिनेत्री राधिका सरथकुमारदेखील आहेत. तिने एक व्हिडिओ शेअर करत चाहत्यांसोबत आपला आनंद व्यक्त केला आहे. हा व्हिडिओ शेअर करत तिने लिहिलं, 'एका दिवसात दिल्ली, माननीय पंतप्रधानांना भेटणं हे किती मोठं सौभाग्य होतं.'

तिने पुढे लिहिलं, 'खूप व्यग्र असूनही त्यांनी आमच्यासाठी वेळ दिला. त्यांना आमच्या लग्नासाठी आमंत्रित करण्याचा मान मिळाला. इतकं प्रेमळ स्वागत केलं त्याबद्दल धन्यवाद. आम्ही अर्थमंत्री निर्मला सीतारामन यांनाही भेटलो. त्यांच्याशी गप्पामारून खूप छान वाटलं. एकंदरीतच खूप भारी अनुभव होता.' वरलक्ष्मीने शेअर केलेले फोटो सध्या सोशल मीडियावर व्हायरल होत आहेत.