साधूचा अवतार, हातात परशु... विकी कौशलच्या नव्या चित्रपटाचा फर्स्ट लूक पाहून नेटकरी भारावले; काय आहे नाव?

बॉलिवूड अभिनेता विकी कौशल याने आजवर अनेक चित्रपटात वेगवेगळ्या धाटणीच्या भूमिका साकारल्या. 'उरी', 'सॅम बहादूर' यांसारख्या चित्रपटातून त्याने प्रेक्षकांच्या मनात स्थान निर्माण केलं. लवकरच तो छत्रपती संभाजी महाराजांवरील 'छावा' या चित्रपटातून प्रेक्षकांच्या भेटीला येणार आहे. अशातच आता त्याच्या नव्या चित्रपटाची घोषणा करण्यात आली आहे. त्याच्या आगामी चित्रपटाचा फर्स्ट लूक प्रदर्शित करण्यात आलाय. यातील त्याचा अवतार पाहून प्रेक्षक चांगलेच खुश झाले आहेत. त्याच्या लूकने सोशल मीडियावर धुमाकूळ घातलाय.

विकीच्या 'महाअवतार' या चित्रपटाचा फर्स्ट लूक समोर आला आहे. त्यात विकी कौशल भगवान परशुरामाची (Bhagwan Parshuram) भूमिका साकारणार आहे. विकीने त्याच्या इन्स्टाग्राम पेजवर या सिनेमाच पोस्टर शेअर केलं असून, तो यात हुबेहूब भगवान परशुराम यांच्यासारखा दिसत आहे. ‘महाअवतार’च्या पोस्टरमध्ये विकी दमदार अवतारात दिसतोय. त्यात त्याच्या दाढी-मिशा आणि केस वाढलेले दिसत असून, त्याच्या चेहऱ्यावर रागीट भाव दिसत आहेत. या सिनेमाच्या पोस्टरबरोबरच एक मोशन पोस्टर रिलीज करण्यात आला आहे. त्यात विकी पाठमोरा दाखवला असून, त्याच्या पाठीमागे भगवान परशुराम यांचं ‘परशू’ हे हत्यार दिसत आहे. विकीच्या हातांना रुद्राक्ष बांधलेलं आहे, आणि हा अवतार पाहून चाहते त्याच्यावर फिदा झाले आहेत.

या चित्रपट २०२६ मध्ये येणार असून त्याचे 'छावा' आणि 'लव्ह अँड वॉर' हे चित्रपटही प्रदर्शनाच्या वाटेवर आहेत. या चित्रपटांची देखील चाहते आतुरतेने वाट पाहत आहेत.