दिवाळीच्या मुहूर्तावर विवेक ओबेरॉयने खरेदी केलं नवं घर; शेअर केला गृहप्रवेशाचा फोटो, पत्नीसाठी लिहिली खास पोस्ट

लोकप्रिय बॉलिवूड अभिनेता विवेक ओबेरॉय याने आपल्या चित्रपटांमधून प्रेक्षकांच्या मनात स्थान मिळवलं. त्याने आपल्या करिअरमध्ये अनेक चढउतार पाहिले. आता करिअरच्या या टप्प्यावर विवेकने चाहत्यांना आनंदाची बातमी दिली आहे. दिवाळीच्या मुहूर्तावर त्याने नवीन घर खरेदी केलंय. धनतेरसच्या मुहूर्तावर त्याने आपल्या पत्नीसोबत नव्या घरात गृह प्रवेश केलाय. धनतेरससोबतच आणखी एक खास औचित्य साधून त्याने नव्या घराची पूजा केलीये. त्याच्या लग्नाला १४ वर्ष पूर्ण झाली आहेत. त्यामुळे या शुभ दिनी त्याने हे आलिशान घर खरेदी केलंय.

विवेक आपल्या संपूर्ण कुटुंबासोबत या घरात शिफ्ट झालाय. धनतेरसच्या मुहूर्तावर त्याने कुटुंबासोबत नव्या घरात गृहप्रवेश केला आहे. त्याने त्याच्या पत्नीसोबत एक फोटो शेअर केला आहे. यात विवेक त्याच्या पत्नीसोबत पूजेला बसलाय. ते दोघे खूप आनंदाने हसताना दिसतायत. या फोटोसोबत विवेकने सुंदर कॅप्शन लिहिलं आहे. त्याने लिहिलं, '4 वर्षांपूर्वी, अग्नीभोवती सप्तपदी घालत असताना, मी प्रियांकावर प्रचंड प्रेम करण्याची शपथ घेतली. आज धनत्रयोदशीच्या या शुभ दिवशी, आपण आपल्या वाडवडिलांच्या आशीर्वादाने आपल्या सुंदर नवीन घरात प्रवेश करत असताना, मी कृतज्ञ आहे. या फॅन्सी भिंतींना तुझ्याशिवाय काहीच अर्थ नाही. माझ्यासाठी, तू माझे घर आहेस आणि तेच माझे हृदय आहे आणि नेहमीच असेल.'

विवेक ओबेरॉयने प्रियांकासोबत २९ ऑक्टोबर २०१० रोजी बेंगळुरूमध्ये लग्नगाठ बांधली. आता विवेक आणि प्रियांका हे विवान वीर आणि अमेय निर्वाण या दोन मुलांचे पालक आहेत. यापूर्वी विवेक अभिनेत्री ऐश्वर्या रायसोबत रिलेशनमध्ये होता. त्यांचं नातं २ वर्ष चाललं. मात्र त्यानंतर त्यांचं ब्रेकअप झालं.