Riteish Deshmukh Fees: 'बिग बॉस मराठीसाठी रितेश देशमुख किती घेतोय फी? वाचा प्रत्येक भागाचं मानधन

Riteish Deshmukh Fees: 'बिग बॉस मराठी ४' प्रेक्षकांच्या भेटीला येऊन दोन वर्ष उलटून गेली. त्यानंतर प्रेक्षक 'बिग बॉस मराठी ५' ची आतुरतेने वाट पाहत होते. आता २८ जुलै २०२४ पासून बिग बॉस मराठीचा सीझन ५ प्रेक्षकांच्या भेटीला आला आहे. या सीझनमध्ये अनेक बदल पाहायला मिळत आहेत. या सिझनचा ग्रँड प्रीमिअर नुकताच पार पडला. या सीझनमध्ये कार्यक्रमाचा सूत्रसंचालक बदलण्यात आला. यापूर्वीचे चार सीझन महेश मांजरेकर हा कार्यक्रम होस्ट करत होते. मात्र त्यांनी कार्यक्रमाचा निरोप घेतला आणि त्यांची जागा आता अभिनेता रितेश देशमुख त्यांच्या जागी ही जबाबदारी सांभाळताना दिसतोय. मात्र या सीझनच्या सूत्रसंचालनासाठी रितेशने किती मानधन घेतलंय तुम्हाला ठाऊक आहे का?

'बिग बॉस मराठी ५' दररोज रात्री ९ वाजता कलर्स मराठीवर प्रक्षेपित करण्यात येतं. यावेळेस बिग बॉसच्या घरात अनेक क्षेत्रातील व्यक्ती आले आहेत. कीर्तनकारांपासून ते कन्टेन्ट क्रिएटर्सपर्यंत अनेक व्यक्ती बिग बॉसच्या घरात पाहायला मिळत आहेत. घरातील टास्क पाहण्यासाठी आता चाहते उत्सुक आहेत. अशात रितेश देशमुख आता कसं सूत्रसंचालन करणार याकडे सगळ्यांचं लक्ष लागलं आहे. अशातच आता त्याच्या मानधनाच्या बाबतीतही अनेक चर्चा सुरू आहेत.

प्रत्येक एपिसोडसाठीचं मानधन

फिल्मीबीटने दिलेल्या माहितीनुसार, 'बिग बॉस मराठी ४' चे होस्ट महेश मांजरेकर हे सूत्रसंचालनासाठी प्रति एपिसोड 25 लाख रुपये घेत होते. आता हा शो दोन वर्षांनंतर पुन्हा सुरू झाला आहे. आता रितेश प्रत्येक एपिसोडसाठी 25 लाखांपेक्षा जास्त पैसे आकारण्याची शक्यता आहे. तो प्रत्येक एपिसोडसाठी सुमारे 30 ते 40 लाख रुपये मानधन घेत असल्याचं बोललं जातंय. त्यामुळे त्याचं एकूण मानधन दोन ते अडीच कोटींच्या आसपास आहे. तर रितेश एका चित्रपटासाठी सुमारे ७ ते ८ कोटींचं मानधन घेतो.

या सीझनमध्ये अभिजीत सावंत, निक्की तांबोळी, अरबाज पटेल, वैभव चव्हाण, आर्या जाधव, वर्षा उसगावकर हे कलाकार दिसत आहेत. तर यावेळेस घरात चक्रव्यूहही थीम आहे.