Arbaz Patel: अरबाजचं निक्कीवरचं प्रेम निव्वळ नाटक; आधीपासून कमिटेड आहे अभिनेता, वाचा कोण आहे त्याची गर्लफ्रेंड

'बिग बॉस मराठी ५' मध्ये नुकताच भाऊचा धक्का पार पडला. या भाऊच्या धक्क्यावर रितेशने सगळ्यांची चांगलीच शाळा घेतली. निकी, वैभव, अरबाज आणि घनश्याम यांना पुन्हा रितेशने सुनावलं. जान्हवीला तर थेट जेलमध्ये टाकलं. तिला पुन्हा चक्कर आली तरी तिला जेलमधून मुभा मिळाली नाही. या आठवड्यात भाऊच्या धक्क्यावर खास पाहुण्यांनी हजेरी लावली होती. तेव्हा घरातील प्रत्येक पुरुषाला काही प्रश्न विचारले गेले. त्यात अरबाजने केलेल्या खुलाशाने अनेकांना धक्का बसला.

काय म्हणाला अरबाज

२६ ऑगस्टपासून म्हणजे आजपासून कलर्स मराठीवर 'दुर्गा' ही मालिका सुरू होणार आहे. या मालिकेतील कलाकार नुकतेच 'बिग बॉसच्या घरात आले होते. तेव्हा त्यांनी एका टास्कदरम्यान घरातील पुरुष स्पर्धकांना प्रश्न विचारले. त्यांनी रॅपिड फायर राउंड खेळत अरबाजलाही प्रश्न विचारले. याच राउंडदरम्यान अरबाजच्या वैयक्तिक आयुष्यातील गोष्टीचा खुलासा झाला. या राउंडदरम्यान दुर्गा अरबाजला विचारते, 'हा प्रश्न संपूर्ण महाराष्ट्राला पडलाय आणि याचं तुम्ही खरं उत्तर द्यायचं आहे. तुम्ही सिंगल आहात की कमिटेड?' यावर अरबाज ताबडतोब कमिटेड असं उत्तर देतो.

कोण आहे अरबाजची गर्लफ्रेंड?

अरबाज हा स्प्लिट्स व्हिला १५ पासून रिलेशनशिपमध्ये आहे. या शोमध्ये अरबाजचं नायरासोबत नातं होतं. मात्र, हा शो संपल्यावर त्याने खऱ्या आयुष्यातील प्रेमाची कबुली दिली. यानंतर नायराने त्याच्यावर अनेक आरोप केले होते. त्यानंतर 'बिग बॉस मराठी ५'च्या घरात येण्यापूर्वी त्याने टाइम्सऑफ इंडियाला मुलाखत दिली होती. त्यात त्याने आपण लीझा बिंद्राबरोबर रिलेशनशिपमध्ये असल्याचं सांगितलं होतं. त्याने तिच्याबरोबर अनेक व्हिडिओदेखील बनवले होते. सध्या अरबाज लीझासोबत रिलेशनमध्ये आहे.

अरबाजने निक्कीसाठी टोमॅटोचं हृदय बनवणं, पहिल्याच आठवड्यात घन:श्यामने तिला वहिनी हाक मारणं, अरबाजने कॅप्टन्सीवर पाणी सोडत निक्कीला कॅप्टन बनवणं, बीबी करन्सी वापरून निक्कीला सेफ करणं अशा बऱ्याच गोष्टी केल्या होत्या. त्यामुळे त्यांच्यात प्रेम फुलतंय का अशा चर्चा होत्या. आता त्याच्या कमिटेड या उत्तराने अनेक नेटकऱ्यांनी आश्चर्य व्यक्त केलं आहे.