Pankaja Munde: ..नाहीतर आपल्याला कोणीही ओळखणार नाही, पंकजा मुंडे यांनी भाजप कार्यकर्त्यांना केलं हे आवाहन

धायरी, ता. ५ : ‘‘विधानसभा निवडणुकीत कार्यकर्त्यांनी विजयाचे शिल्पकार व्हावे,’’ असे आवाहन भाजपच्या राष्ट्रीय सचिव पंकजा मुंडे यांनी येथे गुरुवारी केले.

खडकवासला विधानसभा मतदारसंघाची बैठक झाली. त्यावेळी त्या बोलत होत्या. त्या म्हणाल्या, ‘‘मुख्यमंत्री लाडकी बहीण योजना सर्व महिलांपर्यंत पोहोचवणे आवश्यक आहे; नाहीतर आपल्याला कोणीही ओळखणार नाही.’ मुख्यमंत्री लाडकी बहीण योजनेमुळे निवडणुकीत बदल होऊ शकतो. जशी पुणे लोकसभा मतदारसंघात ताकद दिली जाते, तशी बारामती लोकसभा मतदारसंघात देणे गरजेचे आहे. पुणे महापालिकेत समाविष्ट झालेल्या गावांना सर्व सोयी-सुविधा मिळणे आवश्यक आहे, असे कार्यकर्त्यांनी मुंडे यांना सांगितले. आमदार भीमराव तापकीर यांनी मुंडे यांचे स्वागत केले. यावेळी मतदारसंघातील सर्व कार्यकर्ते उपस्थित होते.

वाघोलीतही घेतला आढावा

वाघोली : ‘‘मी कधीही थांबणार नाही, कोणासमोर झुकणार नाही. काम करत राहीन. तुम्ही असेच प्रेम करत रहा,’’ असे आवाहन पंकजा मुंडे यांनी येथे केले. भाजप युवा मोर्चाचे जिल्हाध्यक्ष संदीप सातव यांच्या वाघोलीतील जनसेवा कार्यालयाचे उद्‍घाटन मुंडे यांच्या हस्ते झाले. त्यावेळी मुंडे बोलत होत्या. पुढे त्या म्हणाल्या, ‘‘मी सध्या मंत्री नाही, केवळ आमदार आहे. तरीही तुम्ही कार्यक्रमासाठी गर्दी केली. आपल्या एकमेकांवरील प्रेमापोटीच तुम्ही आला. बीड, परळीतीलच नाही; तर महाराष्ट्राच्या जनतेशी माझी नाळ जुळलेली आहे.’’ तत्पूर्वी मुंडे यांनी पदाधिकारी व कार्यकर्त्यांशी संवाद साधला.