Ladki Bahin Yojana : ‘लाडकी बहीण’ चा पहिला हप्ता १५ ऑगस्टनंतर - उपमुख्यमंत्री देवेंद्र फडणवीस

वरुड : लाडकी बहीण योजनेने विरोधक घाबरलेले आहेत. याबाबत नकारात्मक प्रचार सुरू आहे. या योजनेचे पैसे कोठून आणणार0 हा सवाल विरोधकांना पडला आहे. आम्ही पैसे देणारच आहो, १५ ऑगस्टनंतर लाडकी बहीण योजनेचा पहिला हप्ता वितरित केला जाणार असल्याचे प्रतिपादन उपमुख्यमंत्री देवेंद्र फडणवीस यांनी केले.

शहरातील रामदेवबाबा मंगल कार्यालयात राज्यसभा खासदार डॉ. अनिल बोंडे यांच्या वाढदिवसाचे औचित्य साधून आयोजित जिल्हा ग्रामीण भाजप कार्यकारिणीच्या महाअधिवेशनात ते बोलत होते. व्यासपीठावर उपमुख्यमंत्री देवेंद्र फडणवीस,

राज्यसभा खासदार डॉ. अनिल बोंडे, माजी खासदार नवनीत राणा, आमदार प्रताप अडसड, माजी आमदार केवलराम काळे, प्रभुदास भिलावेकर, रमेश बुंदिले, किरण पातूरकर, मोर्शी विधानसभा निवडणूक प्रमुख डॉ. मनोहर आंडे, ज्योती मालवीय, डॉ. वसुधा बोंडे, भाजप प्रदेश प्रवक्ता शिवराय कुळकर्णी, आदी उपस्थित होते.

उपमुख्यमंत्री फडणवीस म्हणाले, मुख्यमंत्री महायुतीचाच होणार. भाजप हा महाराष्ट्रातील सर्वांत मोठा पक्ष असेल. गेल्या निवडणुकीत विरोधकांनी मोठ्या निगेटिव्ह अफवा पसरविल्यामुळे आपल्याला काही ठिकाणी जागा कमी मिळाल्या, याची खंत आहे. त्याला उत्तर देऊ शकलो नाही, त्याचा परिणाम मतांमध्ये झाला. योजनांबाबत संभ्रम पसरविला गेला. संविधानाचा खोटा प्रचार केला, आरक्षणाचा अपप्रचार केला गेला, असेही ते म्हणाले.

संत्राउत्पादक शेतकऱ्यांना निर्यातीबाबतचे अनुदान दिले जाणार आहे. वैनगंगा-नळगंगा प्रकल्प मंजूर करून विदर्भाचे चित्र बदलले जाईल. विरोधकांच्या अपप्रचाराला बळी न पडता आपली भूमिका तटस्थपणे मांडा व महायुतीचे सरकार आणण्यासाठी मैदानात उतरा, असे आवाहन यावेळी उपमुख्यमंत्री देवेंद्र फडणवीस यांनी केले.

यावेळी बोलताना खासदार डॉ. अनिल बोंडे यांनी विरोधकांनी खोटे बोलून बोलून लोकसभा निवडणुकीत काही ठिकाणी आपला पराभव केला, परंतु खोटं जास्त दिवस टिकत नसते, त्यामुळे आता कार्यकर्त्यांनी सज्ज व्हावे, असे आवाहन त्यांनी केले. संचालन भाजप तालुकाध्यक्ष राजकुमार राऊत यांनी, तर प्रास्ताविक खासदार डॉ. अनिल बोंडे यांनी केले. आभार माजी पं. स. सदस्य अंजली तुमडाम यांनी मानले.